Nuummi nissiaqqat juullerpaluttunik qaammaqqusersuipput
Juulleriartornerani illoqarfissuarmi Nuummi ilisarnaataalluartartut, tassa qullersuarni qaammaqqutit juullerpaluttut, ikkussorneqarmata alutorineqaqaat.
Ikkussuisummi alutorineqartaqisut, ukioq manna nissiaqqatut atisalersorsimasut inunnit sanioqquasunit alutorineqarsimaqalutik malugisimavaat.
- Qungujulluttaarlutik assilisaqattaarlutalu pisaramik, taava maannakkut ingasanneruvoq, Mutsi Motzfeldt oqarpoq.
Mutsi Motzfeldtimi ukiut tallimassaanni qaammaqqutinik juullerpalaartunik qullersuarnut ikkussuisavoq. Suleqataalu Inuk Højgaard ukiut sisamassaanni qaammaqqutilersueqataalluni. Juullillu inuata ikiortaatut atikkersorlutik suliaqarnissartik siorna isumassarsiarivaat.
- Siornatigut maluginiartarakku nuannarineqarsuataartartoq meeqqat aalaterisarlutik. Ukioq kingulleq isumassarsiaraarput nissaqqatut atisaqarluta misilillugu, taava massakkut atiseriaratta malunnartumik meeqqat nuannisarnerujussuupput, Inuk Højgaard KNR-imut oqarpoq.
Maanilu illoqarfissuarmi Nuummi taamatut qullersuarnut juullerpalaartunik qaammaqqusersuineq ulluinnarlugu suliarineqarneq ajorpoq, nalinginnaasumillu ullut pingasut suliarisarlugit Mutsi Motzfeldtip oqaatigaa.
- Naliginnaasumik ullut pingasut ingerlattarpagut. Ullut pingajussaa naammassiartuaarnermi nuannerseqqittarpoq.
- Taamatullu qaammaqqusersuineq Arssarnerini innaallagisserisut nuannersumik suliaqarfiusoq Qanoruumut oqaatigaat, Mutsi Motzfeldt oqarpoq.
- Siornatigut nipilersukkanik juullerpaluttumik tusarnaajutigaluta sulisarpugut, taava aamma taarsigaangat ikikkaangata nuannequtaasaqaat, Inuk Højgaard KNR-imut oqarpoq.
