Nuummi nipilersornermik ukiumoortumik festivali aallartilerpoq
Festivaleqarnissamulli aningaasartuutissat millionip missaaniimmata Nuummi suliffeqarfiit ikiuussimanngitsuuppata piviusunngorsinnaasimassanngikkaluarpoq. Festivalimi tamakkerlugu peqataajumagaanni 400 koruunit amerlagisassaanngillat, ilami aaqqissuisut tusarnaariat sapinngisamik amerlanerpaajutinneqarnissaat pingaartissimavaat, sinneqartooruteqarujussuarnissarlu tunulliunneqakannerneqarsimalluni.
- Nuummi suliffeqarfiit ikiuussimanngitsuugunik ajornartorsioqqajaqaagut. Taakkumi aningaasaleeqataaqqimmata nipilersortussat assigiinngiiaartorujussuit neqeroorutigisinnaanngorpagut. Ukiorlumi manna Festivalertarnitta tallimassaat ingerlanneqalerpat aatsaat taama assigiinngiiaartigisunik neqerooruteqarsinnaassaagut. Asulu Katuap nipiliuutai nipigilluinnartuusut, taamaammat tusarnaariartussat nuannivissumik nipigilluinnartumillu nipilersortunik tusarnaaginnaratik Katuap tusarnaariarfigalugu nuannerluinnartuunera misigisat qaavatigut misigineqarsinnaassasut, Ejvind Elsner, ukioq manna Festivalernissamut aaqqissueqataasut ilaat taama unnersiorpoq.
Nuummi Akisuanerit Festivali ulluni pingasuni ingerlanneqassaaq, ullullu tamaasa unnukkut qulingiluanut nipilersortut siulliit aallartittassallutik. Tallimanngornermimi arfininngornermilu nipilersortut tulleriiaaginnavillutik appisimaalerpata nalunaaquttap akunnerini tallimani nipilersortoqartassaaq, sapaatiuppallu Hans Mortensen aamma Tim Christensen appisimaalerpata eqqissisimanerukannersumik ingerlanneqassalluni.
- Nipilersortussat assigiinngiiaarnissaat piaaralutalusooq aaqqissuupparput, tassami nipilersortartut aatsaat nuannarineqaleriartortut kiisalu qangali nuannarineqartut akuleriisillugit nipilersortittarniarpavut. Aamma Nuummiut qallunaartaat eqqarsaatiginerullugit Tim Christensen & and the Damn Crystals aggersarsimavagut. Tamatuma saniatigut nipilersortartut Kalaallit nunatsinnit tamaneersut peqataassapput, nipilersortartutoqqallu inuusugunnaareersimasut nuannarisaat aliannaarfigineqarsinnaallutittaaq, Ejvind Elsner knr.gl-imut taama oqaluttuarpoq.
