Assit: Nuummi nattoralik 2,48 meteriusoq toqusimasoq siumorneqartoq

Steffen Lynge Nuummi sissami tupaallaatigisaminik marlunngormat siumugaqarpoq. Taassuma nattoralik toqungasoq nanivaa.

- Ullaakkut sulillunga pauserama. Sissap killingani pujortaataa pisorusaarlunga nattoralik toqungasoq takuara, Steffen Lynge oqarpoq.

- Uumasut nassaat tamatigut maanga nassiunneqartussaapput

Uumasut eqqissisimatitat toqungasut nanineqartut tamarmik Pinngortitaleriffimmukaanneqartussaapput.

Uumasut Pinngortitaleriffimmut anngunneqartut qerititsivimmut ilineqartarput, Bolethe Skifte Egedellu isumagisarpai.

- Uumasut nassaat tamatigut maanga nassiunneqartussaapput, eqqissisimatitaagamik timmissat ukua. Nattorallit, kissaviarsuit sunaluunnit eqqissisimatitaq maanga nassiunneqartussaavoq tunniunneqarluni, taamaanngippat nunamut qimaanavillugu qimanneqassaaq tigoqqusaanngilaq, Bolethe Skifte Egede oqarpoq. Taanna Pinngortitaleriffimmi Miluumasunut Timmissanullu Immikkoortortaqarfimmi Ilisimatusarnermik teknikeriuvoq.

Steffenip nattoralik siumugaa Pinngortitaleriffimmukaanneqarpoq.

- Aajuna tassa ippassaani tigusarput Nuummi nassaarineqarsimasoq. Una 1 meteri ataatilaarlugu angitigaaq. 98 centimenteri missaaniippoq taava suluisa nuuaninngaanniit nuuanut 2,48 meteriulluni, Bolethe Skifte Egede oqarpoq.

Sumik toqquteqarsimanera ilisimaneqanngilaq

Nattorallip qanoq utoqqaatiginera oqaatigiuminaattoq, Pinngortitaleriffik nassuiaavoq. Nunatsinni nattorallit 21-inik ukioqalersinnaasarput. Unalu nattoralik sumik toqquteqarsimanersoq ilisimaneqanngilaq.

- Arlalitsigut tigusartakkagut inersimasuunngillat utoqqaanngillat. Tassami papii suli qaqortinneqanngitsut inuusuttunik taasaramikkit. Taamaattuunerupput tigusagut kingullertigut, siornalu siornaallu tigusagut.

Nattoralik Pinngortitaleriffimmut tunniunneqartoq uumasuni kisiartaanngilaq. Uumasut eqqissisimatitat arlaatigulluunniit misissugassatut toqqortaatigineqartut Pinngortitaleriffiup qerititsivianiipput.

Pinngortitaleriffiup qerititsiviani uumasut assigiinngitsut nassiunneqarsimasut katersorneqartut ilaatigut misissorneqartarput, imaluunniit unnuk kultuurisiorfimmiluunnit takusassiatut saqqummiunneqartalutik.