Nuummi nakorsiartarfimmut inniminniisoqarsinnaanngoqqippoq

Naallu sulisunik amigaateqartoqaraluartoq piffissamik inniminniisoqarsinnaanngoqqittoq, Nuummi nakorsat qullersaat Jesper Olesen oqarpoq:

- Suli atorfinitsiniarnerput ajornartorsiutitaqarpoq, juunimili pissutsinit maanna pissutsit ajunnginneroqaat, Jesper Olesen nassuiaavoq.

Juuni qaammat nakorsiartarfimmi atorfiit sisamat-tallimat inuttaqarput, maannali arfineq-pingasut sulipput, marluk aalajangersimasumik atorfeqarlutik. Nakorsat arfinillit sulisuugallartuupput:

- Sulisuugallartut tassaapput nakorsatut ilinniagallit nakorsiartarfimmili sulinissamut immikkut ilinniarnerminnik suli naammassinninngitsut, oqarpoq.

Nalinginnaavoq nakorsat ukiut arfinillit angullugit nakorsiartitsisartussatut ilinniaqittarnerat.

- Nakorsat arfinillit sulisorilernerisigut maanna piffissamik inniminniisoqaqqissinnaanngorpoq. Nakorsiarsinnaasulli amerlassusaat killeqarpoq. Tassami inniminniisimasut sisamaagaangata ataatsip, tassa 25 procentiisa, takkutinngitsoortarnera, ajornartorsiutaavoq. Susinnaanngilarput, naatsorsuutigiinnassavarpulli nakorsiaq kingusinnerusukkut takkukkumaartoq, Nuummi nakorsat qullersaat Jesper Olesen oqarpoq.

Nuummi nakorsiartarfimmi neriupput aappaagu februaarip qaammataani nutaanik atorfinitsitsisinnaajumaarlutik.