Nuummi nakorsamut oqarasuaat innuttaasunit atorluarneqarpoq
Ingeborg Heinrich ullaap tungaa nakorsiartarfimmiippoq. Sullisseriaatsip allanngornera iluaquteqaraluartoq aamma suli pitsaanerusinnaasoq oqarpoq,
- Nakorsamut sianiinnarluni sukkanarnerugaluarpoq, kisianni kalaallisuinnaq oqaluttuulluni nutserisussaqaranilu, nakorsamut oqaluttuariniagaq taaneq sapilerlugu taannartaa uuminalaarpoq, Ingeborg Heinrich oqarpoq. Oqaatsinillu aporfeqarneq iliuuseqarfiginiarlugu, nakorsiartarfimmit sianertup aqqa, inuuia kiisalu telefoniata normua piumaneqartarpoq. Paasissutissallu aallavigalugit nutserisut nakorsamik oqaluussaqarniartumut sianeqqittarput, kalaallisuinnarlu oqaaseqartut taamaasillutik aamma sullinneqartarput.
- Allannguineq naliliivigissagukku nakorsianik amerlanernik sullissisinnaalerpugut, siornatigumut sanilliullugu piareersarluarsinnaalerulerpugut, ullup sinneranut suliassat pilersaarusiorluarsinnaaleratsigit, nakorsiartarfimmi nakorsaaneq Jesper Olesen oqarpoq.
Sullissinermilli allannguineq nakorsiartarfimmi sulisunut oqitsuinnaanngilaq.
- Sulisut annerusunik suliaqalersut qularutissaanngilaq. Allannguinerulli malitsigisaanik aningaasartuuteqarnerulinngilagut. Upperilluinnarparpullu sullissinerput pitsaanerulersoq, sulisullu sulisinnaanerat atorluarneqarnerulerluni, Jesper Olesen oqarpoq.
Nakorsat tallimat-arfinillit ullut tamaasa sianertunik sullissisarput, nakorsiarniat, iisartakkaminnik pissarseqqinniat kiisalu nakorsamit siunnersortikkusuttut oqaloqatigisarlugit.
Nakorsiartarfimmi normumik tiguseriarluni nakorsamik takuneqarnissamik akunnerpassuarni utaqqisarneq nakorsamut oqarasuaateqalernikkut atorunnaarpoq.
Nakorsiartoq alla Lissi Olsen, nakorsamut oqarasuaatikkut saaffiginnissinnaaneq pitsaasutut nalilerpaa.
- isumaqarpunga pitsanngoriaataasoq, tassami siornatigut napparsimallunga nakorsiartarfimmut normumik tigusiartornissara ornigisarnikuunngilara, akunnerpassuillu utaqqillunga, maannakkut toqqaannartumik nakorsamik oqaloqateqarsinnaalerneq pitsaasuuvoq, Lissi Olsen oqarpoq.
Nakorsiartarfimmi nakorsamut oqarasuaat 34 44 54-mik normoqarpoq, ullaakkullu arfineq pingasuniit qulit qeqqata tungaanut ammasarluni.