Nuummi najugaqarnissaq Tunumi najugaqarnissamit toqqissisimanarneruvoq

Tasiilami Ittoqqortoormiinilu pinngitsaaliilluni arneriniarnerit ukioq 2007-mi 35-it nalunaarutigineqarsimapput, Nuummi 14-iusut. Sulili ajornerusoqarpoq, tassa 15-it ataallugit ukiulinnik kinguaassiutitigut pinerliinerit Nuummi arfineq pingasut nalunaarutigineqarsimapput, Tunumi katillutik 48-t. Tasiilami politeeqarfiup pisortaata Kristian Sinngertaap tamanna uppernarsarpaa, imigassartornerujussuarlu ajortunut tamanut pissutaanerarpaa:

-Tassa tassunga patsisaarnerpaavoq imigassartornerujussuaq, taannaavoq tassa aallaavik sunut tamanut ajortunut pinerluuteqarnermut tunngasunik. Politiit 2007-mi ukiumoortumik nalunaarusiaat qimerloraanni, kitaani politeeqarfiit tamaasa qaangernikuuarput, taamaallaat Nuummi politeeqarfimmut nalunaarutigineqarsimasut pinnagit. Taamaakkaluartoq inuttussuseq eqqarsaatigalugu ukua qiviassagaanni, arnerit pinngitsaaliinerit atornerluinerillu, amerlanerujussuupput maannakkut Nuummut sanilliullugit Kristian Sinngertaat nassuiaavoq. Aperaarput Nuuk illoqarfissuaq Tunumut naleqqiullugu toqqissisimanarnerunersoq, ima akivoq:

-Aap, taama oqartoqarsinnaavoq, kanngunaraluaqaaq, aap. Kristian Sinngertaat oqarpoq. Aamma aperaarput imigassaq kimittooq aasaq manna Tasiilami matuneqaraluarmat iluaqutaasimannginnersoq, ima akivoq:

-Naamik unikaallannikuupput, malunnartorujussuuvoq eqqissiallanneq maani politeeqarfimmi, sulipilorujussuarunnaarnikuuvugut parnaarussiviillu ulikkaarsimajunnaarlutik, soorunami maannakkut ulikkaaqqagaluarpugut-aasit kisianni suli ajunnginnerusumik ingerlaarpugut, Kristian Sinngertaat nassuiaavoq. Aperaarput tamakku pillugit qanoq iliortoqartariaqarnersoq, ima akivoq:

-Inuit ilikkarnerusariaqarpaat imernissartik, imaassinnaavorli kinguaariit tulliuttut utaqqisariaqassagivut. Pinaveersaartitsinissaq anguniarlugu assigiinngitsorpassuit ingerlagaluarput, sulisussaaleqinerli pissutigalugu unittooqqajaanikuupput, fritidsklubbili ingerlajuarpoq. Aamma inunnik isumaginnittoqarfimmi sulisussaaleqipput, politeeqarfimmi sulisussaaleqivugut, kisiannili qujanartumik ukioq manna kitaaninngaanniit, avataaninngaanniit ikiorneqartorujussuunerput pissutigalugu suliassat annertunerit nungukkiartorput, assulli qimutsitaavugut,

Tasiilami politeeqarfiup pisortaa Kristian Sinngertaat oqarpoq.