Nuummi mittarfimmi killilersuinerit angallannermut aqutsisoqarfimmit atorunnaarsinneqarput

Silaannakkut angallannermi isumannaallisaaneq pillugu killilersuineq siorna septembarimi atuutilersinneqartoq atorunnaarpoq.

Silaannakkut angallannermi sullissivimmi Naviarimi timmisartunik aqqutissiuisut Kalaallit Nunaata silaannartaatigut timmisartunik ingerlaartunik aqqutissiuussisarnissaannik angallannermut aqutsisoqarfimmit kiisami akuerineqarput.

Angallannermut aqutsisoqarfik tusagassiuutinut nalunaaruteqarluni taama allagaqarpoq.

Killilersuinerit atorunnaarsinneqarnerisigut nunatsinni mittarfimmi timmisartut qangattarlutillu mittartut marloriaatinngussapput.

Timmisartut sisamat akunnerup ataatsip ingerlanerani maanna mittarlutillu qangattartaraluartut sisamanngornermit akunnermut arfineq pingasunngussapput.

Timmisartut 15-it sapaatit akunnerit arlaqartut qaangiuppata akunnerup ataatsip ingerlanerani qangattarlutillu missinnaalissapput.

Nuummi timmisartunik aqqutissiuussisartoqalernissaq pillugu suliaq imaannaanngitsuusimavoq, aasakkut angallanneq ulapaarfiusoq  qaammatip tulliani aallartittussaq sioqqullugu, angallannermut aqutsisoqarfimmi pisortap tullia Lars Korsholm oqarpoq.

Nuummi timmisartoqarfik angallannermut aqutsisoqarfimmit siorna septembarimi killilersuiffigineqalerpoq.

Mittarfimmi timmisartut qangattarlutillu missinnaasut killilersuiffigineqalerput.

Tamanna Kalaallit Nunaanni timmisartuussisarnernut eqquivoq.

Timmisartut nunatsinni mittarfinnut nunnittussat, AFIS operatørinit radio atorlugu ullumikkut ikiorneqartarput aqqutissiuunneqarlutik.

Timmisartut ingerlaarfissaat qanorlu qutsitsigisukkut ingerlaassanersut timmisartunik aqqutissiuussisartunit aalajangerneqartarput.

Timmisartunik aqqutissiuussisartut timmisartut Nuummiit Nuummullu ingerlaartut maanna aqqutissiortalissavat.

“Sukumiisumik aaqqiissutissamik” Greenland Airport, Naviair aamma angallannermik aqutsisoqarfik qaammatini arlaqartuni suliaqarput.

Akuersineq isumaqarpoq, Angallannermik aqutsisoqarfiup nalileraa Nuummi mittarfimmi isumannaallisaaneq nunat tamalaani maleruagassanut naapertuutsitsisoq, Nuup mittarfiata  qulaani silaannaq nakkutiginnissinnaalerlugu.

Timmisartunik aqqutissiuisut suliassarilissavaat angallannermik aqqutissiuisassallutik, timmisartunut paasissutissanik maannakkut nalunaarutiginnittartut timmisartut aquttuinut qangattalernermi milernermilu mittarfiup silaannartaata qanoq inneranik paasissutissiisarnertik ingerlatiinnassavaat.