Nuummi mittarfik 2.200 meterinngorlugu talliniarneqarpoq
- Nuup mittarfiata 950 meteriusup 2.200 meterinut tallineqarnissaanut Inatsisartuni amerlanerussuteqartut tapersersuinerat tusarlugu Nuup Kommuneanut nuannersuuvoq, Nuup Kommuniani borgmesteri, Agnethe Davidsen oqarpoq, angallanneq pillugu Inatsisartuni ippassaani annertuumik oqallinnermut qisuariarluni.
Mittarfik tallineqarsinnaassaaq mittarfimmik ingerlatsinermut avataanit nammineerluni ingerlatsiniarnermi aningaasaliisoqarsinnaappat, Nuummi mittarfiup tallineqarnissaanut Inatsisartut taama piumasaqarput.
Tamatumunnga oqaatigineqarsinnaavoq Nuup Kommunea mittarfimmut 2.200 meteritut takitigisumut suleriaasissatut pilersaarummik Nuuk Atlantic Airportimik taasamik pilersaaruteqareermat, Nuup Kommuniani borgmesteri oqarpoq.
Suleriaasissatut pilersaarummi atuarneqarsinnaavoq siunnersuutaasoq ingerlatseqatigiiffik Nuuk Atlantic Airport A/S Namminersornerullutik Oqartussanit, Nuup Kommunianit inunnillu ataasiakkaanit piginneqataaffigineqarsinnaassasoq, Agnethe Davidsen oqarpoq.
- Naatsorsuutigaara Naalakkersuisut aamma Nuup Kommuniata siunissami ingerlatseqatigiiffissaq Inatsisartut 2008-mi upernaakkut ataatsimiinnerisa nalaanni piviusunngortissinnaassagaat, taamaalilluni mittarfiup tallilerneqarnissaa piaartumik aallartineqarsinnaaniassammat, borgmesteri naggasiivoq.
