Nuummi meeqqat unataasut
![](/sites/default/files/styles/image_934x467/public/article_images/politiskilt2_630_22.jpg?itok=rtVFg3TU)
Akissarsiffiup nalaa Nuup politeeqarfiani ulapaartitsisimavoq sapaatip akunneratalu ingerlanerni 215-riarluni politiinut saaffiginnittoqarsimavoq.
Nalunaarutineqartut ilagaat meeqqat unataasut. Nuup politiivi nalunaarput meeqqat qulingiluaniit 13-inut ukiullit meeraqatiminnik saassussisimasut. Tamannalu sapaatip akunnerata ingerlanerani pingasoriarluni pisimavoq.
Politiit misissuinertik suli ingerlappaat suliamulli tassunga inunnik isumaginnittoqarfik akuliutsinneqareerpoq.
Persutaanerillu suli ukioqqortunerulaartuni sakkortunerupput. Inuusuttut tallimat arfinillit inuk ataaseq saassussimavaat timaatigut isimmittarlugulu tilluarsimallugu, Nuup politiivini pigaartoq Bjørn Bjerregaard nalunaarpoq.
Biilinik tillittoqartarnera suli tusarsaavoq sapaatip akunnerata ingerlanerani biilit arfinillit tillinneqarsimammata biilinilu tillinniarnerit sisamat pisimallutik. Politiit aammaarlutik innuttaasut kajumissaarpaat arlaannik pasinarsinnaasunik takusaqassagunik politiinut nalunaarutigisaqqullugit.
Nuup politiivi oqarasuaateqarput 32 14 48.