Nuummi meeqqat sumiginnakkat amerlassusaat kisitsisaatigineqalerput

Nuummi meeqqanik sumiginnaaneq annertusiartortoq nalunaarusiami nutaami takuneqarsinnaavoq. Misissuineq politiinut nalunaarutigineqartut tunngavigalugit suliaavoq, meeqqallu sumiginnakkat pillugit kisitsisaateqartoqalerpoq.

Tarnip pissusaanik ilisimasalik Kirsten Ørgaard Kalaallit Nunaanni Sulisitsisut Peqatigiiffianni atorfilik misissuisuuvoq, taassumalu politiit 2002-mi 2003-milu ulloq unnuarlu nalunaarutaat misissorsimavai.

-Nalunaarusiaq una suliarivarput, Nuummi meeqqat inuusuttuaqqallu sumiginnakkat qanoq amerlatigisut paaserusukkatisigu uppernarserusullugulu. Tusartuartarparput meeqqat sumiginnakkat amerlasoorujussuusut tamannali maannamut kisitsisaatigineqarsimanngilaq, Kirsten Ørgaard oqarpoq.

Politiinut nalunaarutigineqartartut misissuinermilu atorneqartut tassaasarput meeqqat pinerluuteqarsimasut imaluunniit pinerluffigitissimasut.

Misissuinerup takutippaa meeqqat ukioqanngitsuniit 17-nit tikillugit ukiullit politiinut nalunaarutigineqartartunut ilaasut 2002-mi 1033-inik amerlatigisimasut, taakkunannga meeqqat pinerliisimasut pinerluffigitittulluunniit 601-iusimallutik. Agguaqatigiisillugu ullormut pingasuusarlutik.

2003-mi meeqqat pinerliisimasut pinerliffigitittulluunniit 726-iusimapput, tassa agguaqatigiisillugu ullormut meeqqat sisamat politiit nalunaarutaanni ilaasarlutik.

Niviarsiaqqat pinerliigaangamik pisiniarfinni tillinniarnermik pinerluuteqarnerusarsimapput, nukappiaqqallu inoqatitik atornerlullugit imminnut pisuunngorsarnerusarsimallutik, tassa pisuttorsartarlutik.

Meeqqat pinerliiffigineqarsimagaangamik nakuuserfigineqartarsimapput, kinguaassiutitigut atornerlunneqarsimasarput, angerlarsimaffinni eqqissiviilliortinneqarsimasarput, meeqqerivimmit aaneqanngitsoorsimasarput, imaluunniit angerlarsimaffimmi qimaannarneqarsimasarput imaluunniit unnuami aqqusinermi nassaarineqarsimasarlutik.

-Isumaqarpunga kisitsisit ernumanartorujussuusut, kisitsisillu takutippaat maani Nuummi meeqqat amerlasuut nuanninngitsumik inuuneqartut, Kirsten Ørgaard oqarpoq.

Kirsten Ørgaard-ip ilanngullugu naqissuserpaa, nalunaarusiaq kimulluunniit unnerluutiginninniaanerunngimmat, ajornartorsiummilli saqqummersitsiniaanerusoq. Siunertarineqartorlu oqallinnermik pilersitsiumaartoq.