Nuummi meeqqat kaattut neriniartarfiliartarput akeqanngimik neriniaalunniarlutik
Nuummi Cafe Chilimi sulisoq ima oqaluttuarpoq:
- Aap taamaattunik nalaataqartarpugut, inuit kaattut isertarput ingeriarlutillu nerisakunik nerisut takusarpavut ilaasalu aamma nerisakut angerlaattarpaat. Tamanna ullut tamaasa pineq ajoraluarpoq kisianni ilaanneeriarluni taamaattoqartarpoq. Inuillu tamakku tassaanerupput inuiaqatigiinni inuit sanngiinnerusut aammalu inuit unnukkut imerniartarfimmiissimasut aqaguanilu aningaasaataarussimagamik sinnikutoriartortut, Café Chilimi sulisoq Elise Pedersen radio aviisimut oqarpoq.
Taanna nangilluni oqaluttuarpoq aamma meeqqat kaallutik isertartut.
- Meeqqat sinnikusiorpallaarneq ajorput kisianni piarsuutigut tigoorartarpaat soorlu sukkut, milluaatit, tiit, saviatsillu. Kissassimaariartorusunnerusarput perusuersariartorlutilluunniit, Elise Pedersen oqarpoq.
Taanna nassuiaavortaaq containerit eqqaaviit eqqaavissiortoqartarnera pillugu parnaarsortalersimagitik taamaammallu tamanna maanna ajornartorsiutigiunnaarsimagitsik.
Neriniartarfiutilik alla, neriniartarfimmik Esmeraldamik piginnittoq Kristine Berthelsen Winberg ima oqaluttuarpoq:
- Ullaakkut aamma unnukkut ullut tamaaviisa meeqqat isertarput, meeqqat mikisut angisuut isertarput. Kissalaartumiikkusuttarput isiginnaagassiamik TV-imeersumik isiginnaariartortarput ilaanneeriarlutalu nerisittarpavut tassami meeqqat kaattaramik, nerinikuusimasanngillat aperigaangakkit akisarput nerisimanatik taava toastinnguamilluunniit sanaattarpakka, Kristine Berthelsen Winberg oqaluttuarpoq.
Taanna nangilluni oqaluttuarpoq meeqqat ullormut qulit missaat neriniartarfimmut isertorisaritsik.
Taama kingulliulluni oqarpoq Nuummi neriniartarfimmik Esmeraldamik piginittoq Kristine Berthelsen Winberg. Taanna erseqqissaavoq containerimi eqqakkanik sinnikusiortunik takusaqartaratik naak eqqaavik parnaarneq ajoraluaritsik.
