Nuummi meeqqat illussaat Mælkebøtten tapersersorneqarluarpoq
Nuummi meeqqat inuusuttullu illussaannut Mælkebøttemut katersuiniarneq ingerlalluarpoq. Meeqqat inuusuttullu ornittagassaat iunuinnarnit aallarnisarneqartoq amerliartuinnartunit tapersersorneqaleriartorpoq.
Meeqqat illussaannik Mælkebøttemik pilersitsiniarnermi aqutsisup Kirsten Ørgaardip aningaasanik 1,4 milliuuni koruuninik katersisoqareersoq oqaatigaa.
Taanna aamma oqarpoq aningaasat 5 milliuuni koruunit atorfissaqartinneqartut, katersallu naammatsissimassappata aappagu marsi naatinnagu illu ammarneqarumaartoq.
Pilersitsiniaqatigiit illup ingerlannissaa pillugu Nuup kommunianut isumaqatiginniarnissamik qinnuteqarput, taannalu Nuup kommuniata aappagu aningaasartuutissaasa inaarnissaanut ilanngunneqarumaarpoq.
Illup Mælkebøttenip ingerlatsinermut 4 milliuuni koruuningajannik naleqassasoq naatsorsorneqarsimavoq, 4 milliuuni koruunit meeqqat arfineq-marluk angerlarsimaffiup avataanut inissinneqartartut aamma naligai.
Aningaasaateqarfiit inuinnaallu aningaasanik tunisiumasimapput, soorlu Danmarkimi Hjørringimi ungdomsklubbe nipilersuutisiniutissanik katersisimavoq.
Kungissakkunnut atatillugu rockimik aasaq tusarnaartitsisoqarnerani sinneqartoorutit ilaat aamma Meeqqat inuusuttullu ornittagassaannut piumaartut, pilersitsiniarnermi aqutsisup Kirsten Ørgaardip oqaatigaa.
