Nuummi meeqqanut atuagaateqarfimmi nissiaqqanik ujarlerneq
Piffissami juullimi aaqqissuussinerit tulleriiaatiinnarfianni Nuummi meeqqanut atuagaateqarfimmi saqqumilaarnaveersaartoqarpoq. Atuagaateqarfimmili sulisut juullerpalaartitsinngitsoorsinnaanngillat, taamaattumillu aamma meerarpassuarnut meeqqanut atuagaateqarfimmut isertartunut ullut tamaasa unammisitsisoqarniarpoq.
-Meeqqanut atuakkami tegneseriamiluunniit ilisarisimaneqarluartumi inuttaasoq nissiaqqap nasaanik nasalerniarlugu toqqarsimavarput. Atuisartuttalu ullormi nissiaraq nassaariniartussaassavaat. Arlaatalu ullormi pinnattaassaq pinnattaarisinnaavaa. Annertuuliutiginngilarput, ullormili ajugaasuulluni meeqqanut nuannertuaannarpoq, meeqqanut atuagaateqarfimmi sulisut ningiuat Mette Laustsen knr.gl-imut oqaluttuarpoq.
Juullip qaammataani meeqqanut atuagaateqarfimmi annertunerusumik aamma aaqqissuussisoqassamaarpoq. Ullukinnermi decembarip 21-iani tamanna pissaaq. Pulaartut kaagiarartugassaqartinneqarlutillu saftitugassaqartinneqassapput, aammalu meeqqanut juullerpaluttunik filmertitsisoqassalluni.
-Ammarniutaa meeqqanut juullerpaluttumik filmertitsissaagut. Mikinernut filmertitsisinnarluta ullup ingerlanerani angajullernut filmertitsisassaagut. Peqatigisaanik ullukinneq nalliussissavarput, tamannami maani kommunitsinni ileqqorivarput. Ullormimi tassani qaamaneq Nunatsinnut kingumut utissaaq, Mette Laustsen oqarpoq.
