Nuummi meeqqanik atornerluisimasorisaq alla tigusarineqarpoq
Suliaq meeqqanik atornerluisimanermut tunngasoq nutaaq Nuummi aallartinneqarpoq. Nuummi politiit angut 50-t tungaanut ukiulik sapaatip-akunnera kingulleq tigusaraat.
Tigusarineqartoq meeqqanik arlalinnik kinguaassiuutitigut atornerluisimasutut pasineqartoq, AG ullumi saqqummersoq allappoq.
Politimesterip tullersortaa Bjørn Bay radioavisimut oqarpoq, angut niviarsiaqqanik arlalinnik atornerluisimasutut paasineqartoq.
Angut alla Nuummi marsip ulluisa 22-anni tigusarineqarpoq, meeqqanik arlalinnik atornerluisimasutut pasineqarluni.
Suliat marluk imminnut attuumassuteqannginnerat politiit erseqqissarpaat. Sulialli siulliup misissornerani angut sisamanngormat tigusarineqartoq pasineqalersimasoq, Bjørn Bay ilisimatitsivoq.
Nunatsinni meeqqanik kinguaassiutitigut atornerluinerit arlallit Narsamit avannamut Qeqertarsuaq tikillugu piffissami kingullermi sivitsulersumi politiinit suliarineqalerput.
Bjørn Bayip meeqqanik atornerluinerit amerliartorsorinngilai.
- Pisortat ingerlataanni sulisut innuttaasullu iliuuseqarnissamut eqqumanerulersimanerat suliat amerliartornerannut pissutaavoq, oqarpoq.
Angut sisamanngormat tigusarineqartoq sapaatip-akunnerini sisamani tigummigallagassanngortitaavoq.