Nuummi marloriaammik sukkatigisumik misissuisoqarsinnaalertoq
Coronavirusimik tunillatsissimasut nunatsinni aatsaat taama amerlatigipput. Namminersorlutik Oqartussallu tunillatsissimasunik sapaatit akunnerata siuliata naanerani paasinninnermut atatillugu Nuummi inuit sumiiffinni aalajangersimasuniissimasut tunillatsissimanerlutik misissortikkiartornissaannik kaammattorpaat.
Pingaartumilli akiuussusersorneqarsimanngitsut misissortikkiartornissaat kaammattuutigineqarpoq, taakkualu siulliullutik misissortikkiartussasut naatsorsuutigisimagitsik, Kommuneqarfik Sermersuumi ataatsimoorussanut sullissiviummut pisortaq nassuiaavoq.
- Kisianni tunillatsissimanissamik ernumasut amerlasoorujussuugamik, taava aamma kapitinnikuugaluit tulleriiaattunut ilanngullutik. Taamaalilluni amerlasoorujussuit utaqqilerput, tigusinnaasagullu piffisami tassani killeqarmat ajoraluartumik amerlasoorujussuit misissortinngitsoorput, Gerth P. Jakobsen taama oqarpoq.
Tamatuma nalaani akunnermut 45-t missaanniittut misissortissinnaasut taassuma paasissutissiissutigaa. Misissortikkiartorniarlutik Nuummi ataasinngormat utaqqisut hunnorujukkuutaat misissortinngitsoorput.
Nuummi misissuivik
- Misissuivik kommunimit ingerlanneqarpoq
- Misissuinissamullu ilinniarsimasut 16-it kommunimi sulinermik saniatigut misissuisarput.
- Timmisartorlutik nunatsinnukarsimasut ulloqeqqannginnerani misissortittarput.
Marloriaammik sukkatigisumik misissuisinnaalertoq
Misissuivilli marlunngornermi unnukkut pitsanngorsarneqarpoq, qarasaasianillu nalunaarsuiffissanik amerlanernik atuisoqalissalluni.
- Tassalu akunnermut 100-t pingasunngorpamit misissorsinnaalissavagut. Tassalu marloriaammik amerlatigisunik misissuisinnaanngussaagut.
Tamatuma saniatigut misissuivik marlunngornermi nalunaaqutaq 12:30-mit unnukkut 20:00-ip tungaanut ammassaaq.
pingasunngornermiillu arfininngornermut nalunaaqutaq 12:30-mit 15:00-imut ammassaaq.
Misissuivik kommunimit ingerlanneqarpoq, misissuinissamullu ilinniarsimasut 16-it kommunimi sulinermik saniatigut misissuisarput.
Sulisullu amerlanngitsut taakkulu sapinngisamik amerlanerpaanik misissuiniarsarisut Namminersorlutik Oqartussanit akiuussusersuinermut ataqatigiissaarisup Anna Wangenheimip nassuiaatigaa.
- Nunatsinni tunillatsissimasut aatsaat taama amerlatigilermata, taamatullu misissortittut aatsaat taama amerlatigimmata, sulisullu amerlassusaat suli taakkuinnaallutik, taamaammat annertoorujussuarmik massakkut suligasuartoqarpoq.
Inuit tunillatsissimasut aqqaneq-marluk Nuummiittut
Nuummi inuit suli marluk covid-19-imik tunillatsissimasut ippassaq paasineqarpoq. Tassalu Nuummi tuniluuffiit assigiinngitsut ilisimaneqartut sisamaalerput.
Nunatta Nakorsaaneqarfia tusagassiuutinut taama nalunaaruteqarput.
- Tunillatsissimasut immikkut tunilluuffiusuneerput. Siulleq tunillaassuunnerit ilisimaneqareersunit pivoq, aappaali sumit tunillanneqarsimanersoq ilisimaneqanngilaq.
Coronavirusimik tunillatsissimasut nunatsinniittut maannakkut 30-iupput.