Nuummi kommunalbestyrelsi inissippoq
Nuummi ukiuni tulliuttuni sisamani kommunalbestyrelsissat ullumi inissipput saqqummiunneqarlutillu. Nuummi borgmesteriuinnassaaq Siumumeersoq Agnethe Davidsen, borgmesterip tulliatut siullertut inissippoq IA-meersoq Maliinannguaq M. Mølgaard borgmesterillu tulliata aappanngorluni Siumumeersoq Doris Jakobsen. Kommunemi suleqatigiilersut suleqatigiissutissaat aamma saqqummiunneqarput.
-Nuuk nunatsinni illoqarfiit pingaarnersaattut inissisimaannassaaq. 1799 meterinik mittarfik tallineqassaaq, Qeqertani umiarsualivissualiortoqassaaq, timersornermi siunnersortimik pilersitsisoqassaaq kiisalu Sullissivik Nuuk patajaallisarneqassaaq. Tamakkuupput Nuup kommunalbestyrelseata inissittup suleqatigiissutissatut isumaqatigiissutaasa ilaat. Tassa Nuummi kommunemut qinersinerup kingorna partiit isertitaqartut isumaqatigiinniareersullu borgmester Agnethe Davidsen, ullumi nalunaarpoq, Nuummi Siumut Inuit Ataqatigiillu ukiuni tulliuttuni sisamani aqutsisunngortut. Tamatuma saniatigut Atassut
sinnerlugu qinigaasoq Jensine Berthelsen Isumaginninnermut Ataatsimiititaliami aamma inissaqartinneqassaaq. Suleqatigiinnissami isumaqatigiissut arfineq pingasunik quleqataqartinneqarpoq, tassani inunnik isumaginninnermi, kultureqarnikkut peqqissutsikkut sulisoqarnikkut inuttullu ineriartortitsinikkut, inissaqarnikkut, inuussutissarsiornikkut kommunemilu sulisut tungaatigut suliunitissat isumaqatigiissuteqarfigineqarput. Mittarfiup tallineqarnissaa umiarsualivissarsuaq allallu angisuut saniatigut innuttaasut atugaat tikivillugit isumaqatigiissut aamma imaqarpoq, soorlu:
- Ilinniagaqartut atugaasa siunaratarlugu Nuummi akeqanngitsumik busertalernissaa sulissutigineqassaaq. Nalunaqqanngitsutut Nuup Bussii Nuup kommuneata 100%-imik pigivaa. Nuup Kommunea Busselskabilu isumaqatigiissuteqareerput Nuummi atuartut meeqqat akeqanngitsumik bussertinneqartarnerannik, taassuma iluani ilinniartut akeqqanngitsumik bussertinneqartalernissaat Nuup Bussiinit misissorneqarnissaa isumaqatigiissutaavoq.
Borgmesteri Agnethe Davidsen kommunalbestyrelsemi suleqatigiilersunik ullumi saqqummiussinermini taama oqarpoq. Agnethe Davidsen aamma oqarpoq Nuummi utoqqaat bussertarnerata akikillineqarsinnaanissaa aamma misissorneqassasoq.
