Nuummi kinguaassiutitigut atornerluisarnermut akerliussutsimik takutitsillutik ingerlaaqatigiilersut
Aaqqissuussineq "Kinguaassiutitigut kannguttaatsuliorneq peqatigiilluta unitsitsigu"-mik qulequtaqartinneqartoq Katuami ualimut nalunaaqutaq marlunut aallartissaaq.
- Kikkulluunniit peqataanissaminnut tikilluaqqusaapput, taamaammat ulloq malunnartinniarlugu kiisalu kannguttaatsuliornerit unitsinnissaannut tapersersuinerit takutikkiartoruk, Kommuneqarfik Sermersooq nittartakkamini taama allappoq.
Oqalugiartussat ilaatigut tassaapput MIBB, Saaffik, Nanubørn, ilaqutariinnermut, naligiissitaanermut isumaginninnermullu naalakkersuisoq Martha Lund Olsen kiisalu Kommuneqarfik Sermersuumi borgmesteri Asii Chemnitz Narup.
Meeqqat Inuunerissuni (MIBB) allattoqarfimmi pisortaq, Jette Eistrup, ilisimatitsivoq, Taqqisuuserisut, MIBB-p sinerissami pikkorissartitai, Nuummi ingerlaaqatigiinnerup peqatigisaanik Aasianni, Tasiilami Upernavimmilu ingerlaaqatigiinnissamik aaqqissuussisimasut.
Maniitsumi Uummannami Taqqisuuserisut sapaatit-akunnerata tulliani aaqqissuussiniarlutik aamma sulissutiginiarpaat.
Pisussamut pilersaarut:
- Nal. 14:00 Tikilluaqqusissaaq Ilaqutariinnermut Naligiissitaanermut Isumaginnin-nermullu Naalakkersuisoq Martha Lund Olsen
- Nal. 14:05 Oqalugiarneq– MIBB Meeqqat Inuunerissut
- Nal. 14:10 Pisoqatigiinneq Katuamit Katersortarfimmut Inatsisartullu silataanni inissinneq.
- Nal. 14:25 Oqalugiarneq - Saaffik
- Nal. 14:30 Naggasiilluni oqalugiarneq, Kommuneqarfik Sermersuumi borgmesteri, Asii Chemnitz Naarup.
