Nuummi Kigutileriffimmi suliaritinniartunut atugassarititaasut akuerineqarsinnaangitsut
Suliaritinniartut takkukkaangamik kigutileriffiup silataani siuleriiaallutik kigutileriffiup nalunaaqutaq arfineq-pingasunut ammarnissaanut utaqqisarput, maannakkorpiarlu sila nillertupilussuuvoq silamilu taamatut utaqqisariaqarneq peqqinnarpallaarani. Kigutileriffimmik atuisut ilaata kigutileriffiup pisortai kajumissaarpai suliaritinniartut illup iluani utaqqisalernissaannut periarfissarsioqqullugit.
- Akuerineqarsinnaanngilluinnarpoq, aamma inuit taama sivisutigisumik utaqqisinneqartarnerat naleqqutinngilaq. Oqarasuaatikkut inniminniisoqarsinnaanngimmat allanik periarfissaqanngillat. Sulisut suliartoreersut sooq silami utaqqisariaqartarnitsinnut suna peqqutaanersoq paaserusukkaluarpara, Jens Hansen, Kingutileriffimmi suliaritinniartorpassuit ilaat silamilu qiiaqaluni utaqqisariaqarsimasut ilaat aperivoq.
Kigutit nakorsaata pisortaat Sabine Eugenius toqqaannartumik apeqquteqarfigaa, issittumilu nalunaaquttap akunnerani ataatsimi utaqqisariaqartarnerup pitsaanngitsuunera taassuma isumaqatigaa tamatumunngali peqqutissaqarluartoq aamma oqaatigalugu.
- Ajornartorsiut iluarsiiviginiarlugu ukiuni kingullerni aaqqissuussinernik nutaanik misileraasarsimagaluarpugut. Kigutileriffiulli ammarfissaa sioqqullugu utaqqisunik isaatitsinermi kigutileriffiup pigisaanik ajoraluartumik tillittoqartarneranik, uivertoqartarneranik saaffiginnittarfimmiittullu tatineqartarnerannik misillerfigisimavarput. Saaffiginnittarfiup utaqqisarfiullu akornanni matumik illersittagaliisoqarneratigut ajornartorsiutit taakku iluarsisinnaanissaat naatsorsuutigaarput. Kigutileriffiup ammarnissaa sioqqutingaatsiarlugu takkuttoqartannginnissaanut kajumissaariinnarsinnaavugut, Sabine Eugenius nassuiaavoq.
