Nuummi Kangillinnguit Atuarfianni atualeqqaartut: Silagittoq meeqqallu nuannaartut

Meeqqat atualeqqaartut pissangallutillu ittuulaarput, ullulli ingerlanerani kiinnat nuannaartut sumi tamaani takuneqarsinnaapput.

Angajoqqaarpassuit meerarpassuillu Nuummi Kangillinnguit Atuarfiata eqqaani sisamanngornermi aqqanermut qeqqisimapput. Tamarmik kusanarluinnartunik kalaallisooqarput. 

Kangillinnguit atuarfianni atualertut klassinut marlunnut immikkoortut 52-iupput.

Ukiumoortumik nalliussineqartartoq amerlasuunut nuannaarutaasarpoq.

Coronap ilungersunartorsiortitsineratali kingunerisaanik allaanerulaarpoq. Nunatsinnimi kommunit tamarmik ulloq atualeqqaarfik malittarisassaqartitsiviussasoq isumaqatigiissutiginikuuaat.

Kangillinnguit atuarfianni ulloq atualeqqaarfik nalinginnaasumik eqaarsaartarfimmi ingerlanneqartaraluarpoq. Nalliuttorsiornerilli ullumikkut silami ingerlanneqarput. Qujanartumillu silagippoq.

- Tamanna neriuutigilluinnarsimavarput, 1.a-t klassimi ilinniartitsisuat, Emilie Jessen oqarpoq.

Malittarisassat aappaattut angajoqqaat klassinut atuarfiusunut atualeqqaartut akunnermi atuaqqaarpiarfigisaannut iseqataasinnaanngillat.

Klassimi atuartut akornanni nerriviit imminnut aamma ungasinnerorrapput.

- Atuartut tamarmik immikkut issiapput. Eqqisseqannginnerulaarlutillu nipitunerulaarput. Atuartut sisamat nerrivimmi ataatsimi ataatsimoortaraluarput, Emilie Jessen oqarpoq.

Eqqisseqannginnerulaarnerat meeqqat atuareernermi paaritittarfimmi imminnut nalunngereernerat immaqa pissutaasinnaavoq. Ittoornertillu tassani qimassimasinnaagaat, klassip ilinniartitsisua isumaqarpoq.

- Meeqqat ilaat ittoornerulaarlutillu artorsarnerulaarput, kisianni nalinginnaasorujussuuvoq. Angajoqqaat ajunngilluinnartumik iliorput, Emilie Jessen oqarpoq.

Angajoqqaat: Ernumanngilagut

Elisabeth Abelsen Larsenip panimi atualeqqaanera ullorsiorluassutigaa.

- Ulloq ulapinnaqaaq, kisianni ingerlalluarpoq.

- Malittarisassat malinneqartut takuneqarsinnaavoq, taamaammat ernumanngilagut. Kisianni soorunami corona aallarteqqissagaluarpat soorunami ernumassaanga, Elisabeth Abelsen Larsen oqarpoq.

Meeqqat atualeqqaarfiat nalliuttorsiutiginiarlugu atuarfimmeereernerup kingorna kaffillertoqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat