Nuummi juunip 7-at DHL-stafetteqassaaq

Aappassaa suliffeqarfiit inuillu ataasiakkaat DHL TELE POST stafettimi peqataasinnaapput Nuup illoqarfiata qeqqani arpaffigineqassalluni 5 x 5 kilometeri. Arpanneq taanneqartarpoq nunarsuarmi timigissarluni arpannerit pitsaanersaattut Nuummilu pisussaq DHL-mit, TELE-POST-imit, NS-84-mit Grønlandsbankenimillu aaqqissuunneqarpoq.
Assi © : KNR/Arkiv
Allattoq Noah Mølgaard
maajip 30-at 2012 07:09

Piffissanngoqqippoq ilungersornertalilaarlugu nuannisarnissamut - imaluunniit allatut oqaatigalugu timigissarneq, nerisassat mamartut inoqatinillu nuannisaqateqarnerup ataatsikkut misiginissaannut. Peqataasussat nerisassanik imalimmik koorimik pissarsissapput peqatigiilluni iluarusuutigineqartussamik peqataasut timimik atuereerneranni taassumalu saniatigut TELE-POST Band appisimaassaaq.

- TELE-POST eqqarsaatigalugu stafetterneq DHL-imik suleqateqarluarnitsinnik naqissusiineruvoq kiisalu inuit timersornikkut peqatigiinnikkullu naapeqatigiissinnaanissaannik periarfissiinerulluni, TELE-POST-imi HR-chef Karl-Henrik Simonsen oqarpoq.

Aaqqissueqataasut ilagaat sisorartartut peqatigiiffiat NS 84 ukiukkuunerusoq tusarsaasaraluarluni sisorarnerup saniatigut aamma saqqumilaaqataarusulersoq.

Timimik atuineq aallartissaq nalunaaqutaq 18.00 Inussivimmim, arpannissarlu sioqqullugu peqataasunut koori nerisassanik imalik tunninneqassaaq. Akissarsiasat GrønlandsBankenimit tunissutaapput aammalu aningaaseriviup sulisui arpaffimmi nammineq piumassutsimik ikiuunniarput.

Isiginnaariat aamma imeruersaatinik nerisassanillu stafettip nalaani pisisinnaapput meeqqanullu pississaartarfissuaq pullanneqarumaarpoq anaanap ataatallu arpanneranni sukisaarsarfiusinnaasoq.

Nalunaarnissamut periarfissaq kingulleq tassaasvoq juunip aallaqqaataat uanilu pisinnaavoq: dhl-telepost.gl.

Arpannermi aqqutissaq uani takuneqarsinnaavoq: http://dhl-telepost.gl/2012/wp-content/uploads/2012/05/TP_DHL_stafetrutekort_2012.pdf