Nuummi isumaginninnikkut sullissineq pitsaanerpaanngitsoq borgmesterip nassuerutigaa

Nuup Kommuneata isumaginnittoqarfiani pissutsit ilungersunarput. Sulisut qulingiluaasussaagaluarlutik sisamaannaapput, suliassallu amerlangaarmata pipallatamik aaqqiisariaqartarlutik sulisut tallimanngormat oqariartuutigaat. Innuttaasunut sullissineq pitsaanerpaanngitsoq borgmester Agnethe Davidsenip maanna nassuerutigaa.

- Ajornartorsiuteqarpugut. Isumaginninnermut siunnersortinik ilinniarsimasunik naammattunik sulisussaaleqivugut, tamatumunngalu akissaatit appasippallaarnerat pissutaavoq. Agnethe Davidsen nassuiaavoq.

Nuup Kommuneani isumaginnittoqarfimmi suliassat imaaginnalersimapput pipallatamillu naammassineqartalersimallutik. Sulisut ilaasa soraarnissartik allaat isumaliutigisalersimagaat, immikkoortortami ingerlatsisoq Karen D. Jensen tallimanngormat oqarpoq:

- ”Ikuallattunik qamisaanerinnavimmik” suliaqarpugut. Karen D. Jensen oqarpoq.

Tamanna pillugu Agnethe Davidsen oqarpoq, sulisussaaleqineq qaangerneqanngippat allaffimmiut isumaginninnikkut sullissinermut pikkorissartinneqartalernissaat allaat isumaliutigisalersimallugu.

- Atugassarititaasut pitsanngunngippata kiffipput anigoruminaatsorujussuussaaq, kommunit annerusumik akissaasersuinissamut ammaffigineqartuuppat periarfissagissaarnerulissagaluarpugut. Taamaaliorsinnaannginnattali naalakkersuinikkut kiisalu akissaatit pillugit isumaqatigiinniarnissat eqqarsaatigalugit eqqumaffigilluarneqartariaqarpoq. Agnethe Davidsen erseqqissaavoq.

Sineriammi isumaginnittoqarfinni pisortat Maniitsumi ataatsimeeqqammerput, kommunellu uparuarpaat, mittarfiliornissamik talittarfiliornissamillu pilersaarutinik salliutitsinerarlugit isumaginninnermullu ajornartorsiutinik tunulliussinerarlugit.

- Isumaginninnikkut inuussutissarsiornikkullu oqimaaqatigiissumik ingerlanneqartussaapput, taamaaliornissarlu kommunit tamarmik akisussaaffigivaat. Taakku isumannaarpata allarpassuarnut akissaqalissaavut aamma isumaginninnermut suliniutinut. Agnethe Davidsen oqarpoq.

Nuup Kommuneata meeqqanut ikiortarialinnut ulloq unnuarlu paaqqinnittarfissamik pilersitsinissaq maanna siunniuppaa, kommunalbestyrelsellu tulliani ataatsimiinnissaani sukumiisumik oqaluuserissallugu.