Nuummi politiit innuttaasunut kajumissaarutaat imaattoq ulloqeqqaanerani radioaviseqarnitsinni ingerlateqqipparput: Tassalu innuttaasut angerlarsimaffitik qimakkaangamikkit matut parnaarluartassagaat, soormitaava, aperaagut?
- Isumaqanngilagut qimaasut taakku inunnik ajoqusiiniassasut. Innuttaasunut tamanna paasitissallugu pingaartorujussuuvoq. Kisianniuna taamatut oqarnitsigut mianersoqqusiniartugut, inuusuttut isertitsivimmiit qimaasut arlaannut toqqorfissarsiortarnissaat ilimagigatsigu, politeeq Pavia Kleist oqarpoq.
- Innuttaasut piumaffigerusuppagut angerlarsimaffitik, quitik allallu toqqorfiusinnaasut qimaleraangamikkit parnaarnissaat isumagisaqqullugu.
Inuusuttut arfinillit ujaarisagut taakku sumiissinnaappulluunniit, imaassinnaavoq ikinngutiminni, nalunngisaminni allarluinnarmiluunniit iseqqusaaffimminni toqqorsimasut, Pavia Kleist nangippoq.
Ujaarineqartut tassaapput tigummigallagaasut 19-inik ukiulik Angunnguaq Fly 20-nillu ukiulik Kristian Sørensen. Pineqaatissinneqarsimasullu sisamat, tassaasut Hans Jørgen Heinrich 24-nik ukiulik, Nikki Binzer 20-nik ukiulik, Saalu Simonsen 19-inik ukiulik kiisalu Hansinnguaq Olsvig 20-nik ukiulik.
Pineqaatissinneqarsimasut tamarmik inuup allap inuuneranik navianartorsiortitsisimasuupput.
Pineqartut sumiinnersut Nuummi politiit paaserusuttorujussuuaat. Paasissutissiisinnaasullu Nuummi politiinut saaffiginneqquneqarput, oqarasuaammut 32 14 48-mut.
Nuummi isertitsisarfimminngaanniit inuusuttut qanoq qimaasimanerat suli oqaatigisinnaanngikkallaritsik, isertitsisarfiup pisortaa Peter Jundvad oqarpoq.
Pissutigaat ippassaq sapaammi qimaanerata nalaani pisut nalunaarusiorneqaleruttormata, aatsaallu pingasunngorpat sukumiinerusumik paasissutissiisinnaajumaarput.