Nuummi inuusuttut sullissivittaarput
Nuummi inuusuttut sullissivittaavat aqagu septemberip 30-iani nalunaaqutaq ataatsinut ammassasoq, Nuup kommuneaniit tusagassiutinut nalunaarutigineqarpoq.
Inuusuttut nutaamik centerertaarnissaat inuusuttut siuarsartut peruttuleramik suliniutigisimavaat.
Inuusuttuniillu siunertarineqarpoq illoqarfiup inuusuttaasa nipilersortartut centeri ilaatigut immiussisarfittut sungiusartarfittullu atortassagaat.
Aammattaaq assigiinngitsunik sanaaluttarfeqassaaq taamaalillutik inuusuttut soqutigisaminnik aallussinermikkut piviusunngortitsisinnaasaqqullugit.
Sanaaluttarfiit soorlu atisanik ilusilersuilluni mersortarfiussapput, cykelinik iluarsaasarfiussallutik taamatuttaaq tusagassiutilerinermi sammisaqarfiussallutik.
Inuusuttut centeriat inuusuttunut aqqaneq-marlunniit 25-nik ukiulinnut periarfissiivoq, piffissallu annersaani ulloq unnuarlu ammasartussaalluni.
Inuusuttut centerertaavat Nuup kommuneanit pilersinneqarpoq 9,5 millioni koruuninillu naleqarluni. Taamatuttaaq Lokale- og anlægsfonden-imit 2,5 millioni koruuninik tapiiffigineqarpoq, kiisalu Svend Junge 1 millioni koruuninik aamma tapiivoq.
Inuusuttut centerertaavat KNR-ip illuata (tassa eqqatsinni) kiisalu arsaattarfiup akunneranni inissisimavoq. Ataatsimullu isigalugu 470 m2-risut annertussuseqarpoq.
