Nuummi inuusuttut peqqissuseq oqaluuseriniarpaat

Peqqissutsimut Naalakkersuisup Asii Chemnitz Narupip innuttaasut peqqissusaat pillugu Nuummi inuusuttut unnugu ataatsimeeqatigissavai. Nunatsinni pinaveersaartitsinermik peqqissuunerulernissamullu sulinermik nukittorsaasussamik innuttaasut peqqissuunissaannik suliniummik Naalakkersuisut maannakkut suliaqarput.

Inuunerinnissamut suut pisariaqartinneqarnersut inuusuttullu qanoq takorluugaqarnersut Naalakkersuisut paaserusuppaat, pingaartilluinnarlugulu.

Taamaattumik inuusuttut unnugu ataatsimiisinneqassapput.

- Innuttaasut peqqissuunissaat anguniarlugu upernaat tamaasa suliniuteqartoqartarpoq, Naalakkersuisup allattaa Tukummeq Qaavigaq oqarpoq, nangillunilu:

- Februaarimi ataatsimiisitsisoqariaraluarpoq, takkuttulli ikippallaarmata ataatsimiisitsinissaq unnugumut kinguartinneqarpoq, neriuppugullu inuusuttorpassuit takkutissasut, Tukummeq Qaavigaq oqarpoq.

Ataatsimiinneq unnugu nalunaaqutaq arfineq-pingasunut aallartissaaq, atuarfiup Qorsussuup paaqqinnittarfiani Mikimi.