Nuummi Inuusuttut Ataqatigiit: Akitsuutit qaffannerisigut atornerluisut katsorsartinnissaat anguneqarnavianngilaq
-Imigassap akiisa cigaretsillu akiisa qaffannerisigut atornerluisut katsorsartilerunnanngilasi. Atornerluisut akitsuutinik qaffaanikkut eqqugaasut qaqutiguinnaq aalajangiisinnaassuseqarlutik imerunnaanissaminnut pujortarunnaarnissaminnulluunniit naaggaarsinnaasartuupput, meeraqaraluarunik meeraqanngikkaluarunilluunniit, Inuusuttut Ataqatigiit tusagassiutinut nalunaarumminni allapput.
Aperipput umiatsiarujussuit nuannaariutit imaluunniit biilit angivallaartunik motoorillit akitsuutitigut Naalakkersuisut sooq qaffaavigisinnaannginneraat. Taamaalinikkummi inuit namminneq aalajangersinnaassusiliinnaat akiliinerunissaminnullu nukissaqarluartut kalluarneqassagaluarmata, Inuusuttut Ataqatigiit allapput.
Inuiaqatigiit sanngiiffii aqqutigalugit 100 millioni koruuninik iluanaaruteqarniarsarisoqarnera Inuusuttut Ataqatigiit nuannarinngilaat – apeqqutigaallu Kalaallit Nunaanni pujortartarnerup imigassartortarnerullu annikilliartorneranut suna pissutaanersoq?
-Akitsuusersuineq peqqutaasimanerpa?
-Uagut isumaqarpugut qaammarsaaneq ilinniartitaanerlu aalajangiisuunerpaasut, Inuusuttut Ataqatigiit akitsuutit annertusinerannut akerliullutik tikkuaapput.
