Nuummi inuk ataaseq coronavirusimik tunillatsissimasoq

Nuummi inuk ataaseq coronavirusimik tunillatsissimasoq paasineqarpoq.

Naalakkersuisut tusagassiutinut taama nalunaaruteqarput.

Tunillatsissimasutut paasineqartoq nunatsinnut tikinnerminiit ullut tallimassaanni ileqquusumik misissorteqqereerluni tunillatsissimasoq paasineqarpoq.

Tassa imaappoq, inuk ataaseq nunatsinnut tikinnerminiit ulluni tallimani angerlarsimaannaqqusaasimasoq tunillatsissimasoq paasineqarpoq. Nunatsinnut tikinnermiit ullut tallimassaanni misissorteqqinnissaq piumasaqaataavoq – tunillatsissimasutullu paasineqartoq nunatsinnut tikinnerminiit ullut tallimassaanni misissorteqqereerluni tunillatsissimasoq paasineqarpoq.

Naalakkersuisut tamanna pillugu tusagassiortunik nalunaaqutaq qulinut katersortitsinermi annerusumik paasissutissiissapput, tamannalu knr.gl-ikkut toqqaannartumik aallakaatinneqarpat malinnaaffigineqarsinnaavoq.

AAMMA ATUARUK Tamaat isigalugu: Coronavirus pillugu killiffik

Coronavirusumik nunatsinni qaammatini arlaqartuni maannamut tunillatsissimasoqanngilaq.

Nunatsinni tunillatsissimasoqartoq kingullermik paasineqarmat Nanortalimmi juulip ulluisa 24-anni pivoq. 

Coronavirusimik Ilulissani inummik ataatsimik Aasiannilu inummik ataatsimik tunillatsissimasoqarnikuuvoq. 

Coronavirusumik Nuummi inunnik aqqanilinnik tunillatsissimasoqarnikuuvoq. 

Coronavirusumik nunatsinni tunillatsissimasutut paasineqarsimasut maannamut katillutik 15-iupput. 

Taakkunannga 14-it peqqisseqqissimasutut nalunaarutigineqarnikuupput. 

Coronavirusi Danmarkimi Islandimilu aggustimi septembarimilu tuniluutilertoqqippoq. Naalakkersuisut coronavirusip nunatsinni tuniluutileqqinnissaa aarleqqutigimmassuk nunatsinnut angallannermut malittarisassat septembarip ulluisa 30-anni sukannernerulersippaat.

Nutaanik malittarisassaliunngillat – malittarisassalli upernaaq atuuttut atuutilerseqqippaat. Tassa imaappoq, nunatsinnut tikinnermiit ulluni tallimani angerlarsimaannarnissaq tamatumalu kingorna misissorteqqinnissaq piumasaqaataalerput.