Nuummi inuit 30-it politiinit tigusarineqarput
![](/sites/default/files/styles/image_934x467/public/article_images/blablink_630_4.jpg?itok=3GYEoXXK)
Politiit orniguffigisimavaat imminorniarlutik siorasaarisut pingasut, angerlarsimaffinni eqqissiviilliornerit 24-it, imerniartarfinni aqqusinermiul eqqissiviilliornerit qulingiluat, pisiniarfinni tillinniarnerit 14-it, taxa-mut akiliiumajunnaartut marluk, kiisalu aalakoorpallaat isertitsivimmi unnuisinneqartut arfiniliusimallutik.
Angallannermi inatsimmik unioqqutitsinerit aqqarneq marluupput taakkulu saniatigut inuit 13-it tigusarineqarsimapput ikiaroornartulerinermilu suliat 16-iullutik. Tassa sapaatip akunnera qaangiuttoq Nuummi politiit suliaasa ilaat.
Pisortani atorfillit marluk persuttarneqarsimapput. Suliap aappaani tarnimigut ajoqutillip ikorfartortini saassussimavaa. Suliap aappaani imerniartarfiit ilaata silataani politeeq saassunneqarsimavoq. Saassusisoq ingerlaannaq unitsinneqarpoq tigusarineqarlunilu.
Politiit nalunaarutaat naapertorlugu tigummigallarneqartut sapaatip akunnerata ingerlanerani 30-upput.
Aamma tillinniarnerit arlaqarsimapput tassanilu politiit innuttaasut ikiuunnissaat kissaatigaat.
Tillinniarfigineqarsimasut tassaapput pisiniarfiit Kilu og Ujaloq. Sapaatip akunnerata kingulliup ingerlanerani pinnersaatit nalunaaqutaaqqallu arlallit tillinneqarsimapput.
Aamma Nuuk Imeq-p tunuani containeri 20 fods aamma tillinniarfigineqarsimavoq. Tassani helikopteriaqqat ungasianiit aquttakkat aqqaneq marluk tillinneqarsimapput. Kamik Minimarked aamma tillinniarfigineqarsimavoq tassa cigarettit imigassallu suli qassiuneri paasineqanngitsut tillinneqarsimallutik.
Suli tamakku eqqarsaatigalugit takunnissimasinnaasut Nuummi politiinut saaffiginneqquneqarput oqarasuaat 32 14 48 atorlugu imaluunniit nammineq ornigunnikkut.