Nuummi innuttaasut nammineq akilerpaat

Nuummi Atuarfik Samuel Kleinschmidt-imi atuarfitoqaq, bondegård-imik taaguutilik isateriarlugu nutaamik sanasoqarmat, Nuup kommunea nammineerluni aningaasaliivoq, naak Namminersornerullutik oqartussat sanaartornermi aningaasaliisussaagaluartut.

Nuummi akileraartartut akiliinerat pillugu, kommunalbstyrelsemi ilaasortap Kim Godtfredsen-ip ima nalilersorpaa:

- Nuummi akileraartartut taamatut aningaasartuuteqartinneqarnerat akuersaarneqarsinnaanngilaq. Namminersornerullutik oqartussat akisussaafffeqarnertik takutittariaqarpaat, aappaatigulli aamma namminersornerullutik oqartussat utaqqiinnarneqarsinnaanngillat. Kisianni meeqqat atugassaat kommunep eqqarsaatigisariaqartarpaa.

Iliniartitaanermut naalakkersuisoq Doris Jakobsen oqarpoq, Nuup kommuneata nammineerluni akisussaaffik taanna tigorusussimagaa.

- Nuup kommuneata taamatut aalajangersimanera uagut ataqqisussaavarput, illoqarfinnimi allani atuarfiit aserfallassimaqisut siulliuttariaqarsimavagut. Naalakkersuisoq aamma erseqqissaavoq, siunissaq eqqarsaatiagulugu aaqqissuusseqqinnissamut isumalioqatigiisitap isumaliuutissiissutaanni allaqqasoq, atuarfiit aserfatsaalineqartarnissaat kommunit akisussaaffigilerumaaraat.

- Kommunit akisussaaffeqarnerulissapput, aammalu aserfatsaaliisarnissanut eqeersimaarnerulerlutik, Doris Jakobsen Qanoruumut taama oqarpoq.