Nuummi innuttaasut: Matoqqatitsinermik sivitsuineq ajunngilluinnarpoq
Nuummi covid 19-imik napparsimalersut aqqaniliupput, taakkuli tamarmik aaqqereerput.
Taamaakkaluartoq angallanneq suli uninngavoq.
Nuummi atuarfiit, meeqqeriviit neriniartarfiit assigisaallu apriilip 30-ata tungaanut matoqqapput.
Inuit amerlanerpaamik qulik ataatsimoorsinnaatitaapput - tamannalu apriilip naanissaanut atuutissasoq, Naalakkersuisut siulittaasuata, Kim Kielsenip oqaatigaa.
Taamaaliorneq Nuummi innuttaasunit ajoriffissaqartinneqanngilaq.
Vilhelm Kristoffersen
- Sillimaniarneq pillugu ajorinngilara, Velhelm Kristoffersen oqarpoq.
Hanne Pedersen
- Uanga ajorinngilara, eqqarsarluarneruvoq. Soorlu ullumikkut takusinnaavagut inuit ataatsimoorrattorujussuanngoreernikut, eqqarsarnartorujuuvoq. Uanga aamma nammineerlunga anivunga. Kisianni eqqarsarluarneruvoq sivitsooqqinneq, imatut tassanngaannarujussuaq ammaannaqinagu, Hanne Pedersen oqarpoq.
Christian Broberg
- Immaqami taamatut eqqarsarnarsinnaavoq, kisianni nappaat taama sakkortutigisoq tuniluutinnginnissaa pillugu, uanga isumaqarpunga isummerneq ajunngitsuusoq. Soorunami sulerusukkaluarpugut, kisianni suliartoqqusaanngilagut, allatut ajornaqaaq sulisinnaanngilagut. Nunani allani takoreerpagut qanoq atorneqarnera sakkortutigisoq, inuillu qassit toqqutigigaat, meeqqanut allaat, Christian Broberg oqarpoq.
Ulunnguaq Josefsen
- Isumaqarpunga aamma upalungaarsimaneq eqqarsaatigalugu meeqqat utoqqaat allallu paarilluarneqarnissaat, tamattalumi aamma. Sivitsorneqarnera ajorinngilara kiserliukatannaraluartoq, ajorinngilara, Ulunnguaq Josefsen oqarpoq nangillunilu:
- Neriuppunga taanna nappaassuaq anigoreersimassallutigu, maannakkumut ataasiinnanngortutut taaneqarsinnaavoq, kisianni neriuppunga amerliartoqqissanngitsut. Kisianni taamatut iliuuseqartoqarnera siusinaarnaartoqaranilu kingusinaartoqannginnera kusanaqaaq, pissusissamisoortutut taasinnaavara.
