#iloveNuuk Nuummi innuttaasut 18.000-inngortut
Naak Nuuk ajornartorsiutinik suli unammilligassaqaraluartoq ineriartornerup pitsaasumik ingerlanera borgmesterimit nuannaarutigineqarpoq.
- Uanga nuannaartorujussuuvunga, naluneqanngitsutut Nuummut nuukkusuttut, maanna suliartorlutik, inooqataarusullutik tikilluaqqorusunnartartorujussuummata, taamaattumik nuannissusia.
Kommuneqarfik Sermersuumi borgmesteri Asii Chemnitz Narup taama oqarpoq.
Borgmesterilli illoqarfimmi inissiat paaqqinniffiit allallu amigaataanerat aamma nassuerutigaa.
- Naluneqanngitsutut taannarpiaq unammilligassaq annerpaartaattut isiginikuuarput kommunalbestyrelsimi, taamaammat sanaartugassanut pilersaarusiortussat piviusunngortitsisussallu immikkut pilersippagut tassa allattoqarfik ingerlatseqatigiiffittut ilusilerlugu ”Nuuk city delevopment” taakkualu isumagisussaavaat atuarfiit, meeqqeriviit inissiallu sanaartornissaat pilersaarusiornerlu ingerlalluartupilorujussuuvoq.
Innuttaasut amerliartornerat malunnartinniarlugu #iloveNuuk-mik atserlugu unammisitsisoqassaaq. Unamminisitsinermi peqataaniartut assilisaminnik nassitsissapput, Nuullu pillugu naatsumik nassuiaassallutik.
Nassiussivissaq kingulleq tassaavoq decembarip ulluisa arfineq aappaat. Ajugaasullu tallimat decembarip 14-anni toqqarneqassallutik.