Nuummi innaallagiaarunneq: Kommuni utoqqarnut sanngiinnerusunullu ikiuisinnaasoq
Nuummi suli innaallagiaqanngilaq.
Innuttaasunut utoqqarnut sanngiinnerusunullu kommunimit ikiorneqariinngitsunut qanigisaasut ikiorneqarniarlutik kommunip allaffianut ornigussinnaasut, Kalaallit Nunaanni Politiit tusagassiuutinut nalunaarutigaat.
Nuummi sumiiffinni arlalinni innaallagiaqaranilu kiassarneqanngilaq. Aamma erngup kuuffiini imeqanngilaq.
Peqqinnissaqarfiup Kommuneqarfik Sermersuullu utoqqarnik sangiinnerusunillu kommunimit ikiorneqartariaqartunit qanigisaqartut immikkut ittumik maluginiaanissaat kaammattuutigaat.
Kommunimi innuttaasunit saaffiginnissutinik tigoqqaasussanik sulisoqassaaq.
AAMMA ATUARUK Nuummi innaallagiaarunneq: Kabelikkut ajutoortoqaqqasinnaasoq
Sumiiffinnit sianerfiusinnaasunit ikiorneqarnissamik pisariaqartitsisut Kommuneqarfik Sermersuumut oqarasuaammut +299 367281-imut aamma attaveqarsinnaapput.
Politiit imaluunniit qatserisartut attavigissagukkit politeeqarfimmut, qatserisarfimmut imaluunniit nunaqarfinni kommunefogdemut orniguttariaqassaatit.
Nunatsinni peqqinnisaqarfiit oqarasuaatikkut attavigineqarsinnaanngikkunik pinasuartumik ikiortariaqartut takkutiinnarsinnaapput.
Innuttaasut pinasuartumik pisoqarnerani Aasiaat Radioanut 112-imut sianersinnaapput. Attavik taanna ammatinneqartoq, aalaakkaanngissinnaasorli Tusassip paasissutissiissutigaa. Taamaammat arlaleriarluni sianernissaq pisariaqarsinnaavoq.
Politiit tusagassiiviit pingaartumik KNR Radio aqqutigalugu attaveqartarnissaat naatsorsuutigineqarsinnaavoq.
Kommuneqarfik Sermersuup utoqqaat sanngiinnerusullu kommunimit nalinginnaasumik ikiorneqartartut imaluunniit utoqqaat illuanni najugaqartut attaveqarfigai.