Nuummi innaallagiaarunneq: Kabelikkut ajutoortoqaqqasinnaasoq

Nuummi juullimut qulleeqqat atortorissaarutillu allat suli qaminngapput.

Kalaallit Nunaanni Politiit oqarnerat naapertorlugu Nukissiorfiit kabelimi ajutooqqasoqarnera innaallagiaarunnermut pissutaassangatippaat.

Nuuk ataasinngornermi nalunaaqutaq unnukkut aqqanernulli innaallagiaaruppoq. Nukissiorfiit suliaq misissuiffigigaat, politiit tusagassiuutinut nalunaarummi allapput.

KNR-ip Nukissiorfiit attaveqarfiginiaraluarpaa, tamannali maannamut suli iluatsinngilaq. Nukissiorfiit pisortaata, Kaspar Mondrupip upalungaarsimanermi suliassani pissutigalugit maannakkut apersorneqarsinnaanani KNR-imut paasissutissiissutigaa. Suliffeqarfiit allat pisoq pillugu KNR-imit oqaaseqatitsiniarneq aamma iluatsinngilaq.

Nukissiorfiit nittartagartik innersuussutigaat, taannali maannakkut ajorpoq. Nukissiorfiilli facebookimi qupperneratigut malinnaasoqarsinnaavoq. Nukissiorfiit facebookikkut quppernerat maannakkut marlunngornermi ullaakkut nalunaaqutaq 6.53 kingullermik nutarterneqarpoq.

AAMMA ATUARUK Kalaallit Nunaanni Politiit: Nuup innaalagialersornissaa Nukissiorfiup isumaginiarsaraa

Internettimut attaviit aamma ajutooqqasut oqarasuaatinulli attaviit arlallit attavinitseqqinneqartut Tusassillu kiffartuussineri allat Nukissiorfiit innaallagiaqalersitseqqinnera ilutigalugu attavinitsinniarneqarnerat ingerlaavartumik sulissutigineqartoq, Tusassip paasissutissiissutigaa.

- Tusass ajornartoornermi innaallagiamik atuivoq, attaveqaatit tamaammat aalaakkaanngillat, innuttaasullu sianerniarlutik arlaleriarlutik misiliisariaqassagunarput, politiit Tusass sinnerlugu allappoq.

Politiit imaluunniit qatserisartut attavigissagukkit politeeqarfimmut, qatserisarfimmut imaluunniit nunaqarfinni kommunefogdemut orniguttariaqassaatit.

Nunatsinni peqqinnisaqarfiit oqarasuaatikkut attavigineqarsinnaanngikkunik pinasuartumik ikiortariaqartut takkutiinnarsinnaapput.

Innuttaasut pinasuartumik pisoqarnerani Aasiaat Radioanut 112-imut sianersinnaapput. Attavik taanna ammatinneqartoq, aalaakkaanngissinnaasorli Tusassip paasissutissiissutigaa. Taamaammat arlaleriarluni sianernissaq pisariaqarsinnaavoq.

Politiit tusagassiiviit pingaartumik KNR Radio aqqutigalugu attaveqartarnissaat naatsorsuutigineqarsinnaavoq.