Nuummi initaarniarneq soorlu eqquiniaaneq

Nuummi atorfimmut atatillugu inissanut utaqqisut 75 %-imik ikileriarujussuarput. Tamannali inissianik tunineqartut narroqqusaajunnaarnerannik pissuteqarpoq. Inissiamik najoruminaatsumik tunisinneq ilaasortaminnut ilaatigut ajornartorsiortitsisartoq ilisimagitsik, inatsisilerituut aningaasarsionermullu ilinniarsimasut kattuffiata siulittaasua Sidsel Kjems oqarpoq:

- Erseqqissumik kisitsisaatiginngilarput ilaasortatta ajornartorsiut tamanna qanoq annertutigisumik misigisarneraat, taamaattorli ilaasortat amerlanerit isumaqarput inissiamik tunisittarnermi ajornarsiut atuuttoq, annermik ilaasortagut meerartallit eqqarsaatigalugit, Sidsel Kjems, inatsisilerituut aningaasasiornermillu ilisimatusarsimasut kattuffiata Djøf-ip nunatsinni immikkoortortaani siulittaasoq oqarpoq. Djøffip ilaasortaasa inigisap qanoq ittuunissaanik isummersortarnerat soorunami assigiinnginnerarpaa.

- Danmarkimeersimagaanni aggerfik angerlarsimaffigisimasarlu maani initaarnermi qanoq misiginermut sunniuteqartorujussuusarpoq. Tassa Danmarkimi aningasuumik isikkivigissumik najoruminartumillu ineqarsimagaanni maani inissiamik mikinerusumik, immaqalu blokkersuit ilaanni initaaraanni soorunami pakatsinissaq qularnanngilaq, Sidsel Kjems nassuiaavoq. Isumaqarnerarporlu Nuummi inissat qanoq ittuusut paasigaangamikkit Djøf-ip ilaasortaasa ilaat Nuummi atorfinnut qinnuteqanngitsoortartut.

- Ingammik ilaqutariit eqqarsaatigissagaanni pitsaasumik ineqarnissaq pingaartuutittarpaat. Pitsaasunillu inissarsinissaq nalorninarpat atorfinikkusuttut soorunami qinnuteqarnissaminnut tunuarsimaartarput. Aammali inissiamik najoruminaatsup Danmarkimut utiinnarusulerneq qaninnerulersittarpaa, Sidsel Kjems erseqqissaavoq.

Tikkuarpaalu tamatuma sulisitsisunit eqqumaffigineqannginnera. Inissianik najoruminaatsunik tunineqartut ilaat Djøf-imut toqqaannartumik naammagittaalliortarsimanerarpai, naammagittaalliortullu isumaqartarsimapput atorfininnermut atatillugu isumaqatigiissutigiissutit naapertorneqanngitsut. Sidsel Kjems oqarpoq ajornartorsiummut ilaalluinnartoq initaartut namminneerlutik aaqqiissuteqarsinnaasannginnerat, Nuummi illutaarniartarneq peqatigiillunilu illutaarniartarnermi piffissap sivisusarnera akisuneralu peqqutaallutik.

- Danmarkimi allamik atorfissarsioqqaartariaqanngilaq ineqarnikkut ajornartorsiutit aaqqinniaraanni, maanili ineqarnikkut suliffimmut qilersorsimaneq pissutigalugu allamik suliffittaanngikkaanni inigisaq taarserneqarsinnaasanngilaq, Sidsel Kjems oqarpoq.

Sidsel Kjems aamma oqarpoq atorfinittut inissaannik tunineqartarnerat sulisitsisunit eqqumaffigineqarnerusariaqartoq.