Nuummi inissiisarfittaassamut inissinneqartussaq siulleq pineqaatissinneqarpoq

Angut Kujataaneersoq pinngitsaaliilluni atoqateqarsimasutut, nakuusersimasutut aserorterisimasutullu Nunatta Eqqartuussisuuneqarfiani eqqartuunneqartoq inissiisarfittaassami inissinneqartussanngortinneqarpoq.

Angut pineqartoq inunnut ulorianaatilimmik pinerluuteqarsimasutut siorniatigut pineqaatissinneqarnikuuvoq, tamannalu pillugu matoqqasumik inissiisarfimmi inissineqartussatut unnerluussisussaatitaasup aalajangigaa, Nunatta Eqqartuussisuuneqarfiata isumaqatigaa.

Nunatta Eqqartuussisuuneqarfiata aalajangigaa najukkami eqqartuussiviup aalajangigaanik allanngortitsineruvoq. Angut pineqartoq tarnimikkut nappaatillit inissinneqartarfiannnut inissinneqartussatut taamanikkut pineqaatissinneqarpoq, Danmarkimi pinerluttunik isumaginnittoqarfiup ataani inissisimasumut tassani inissinneqaraluarluni.

Kalaallit pinerluuteqarsimasut, inissiisarfimmilu inissinneqartussatut pineqaatissinneqarsimasut Danmarkimi kingorna inissinneqarsinnaajunnaarnikuupput, angutillu tamanna pillugu Nuummi inissiisarfittaassami inissinneqarnissaa aalajangerneqarluni.

Nuummi matoqqasumik inissiisarfittaassaq maajimi ammarneqarpoq. Kalaallit pineqaatissinneqarsimasut, Danmarkimilu inissinneqarsimasut Nuummi inissiisarfittaassamut inissinneqarnissamut neqeroorfigineqarput. Kalaallit Danmarkimi inissinneqarsimasut 29-t akornanni arfineq-pingasut nunatsinni inissinneqarnissamut neqeroorfigineqarnertik akueraat.