Nuummi inissiat aserfallassimaqisut piaartumik iluarsartuunneqalersut
Inissiarsuit Nuummi H.J. Rinksvejimi Narsarsuarmiittut navianaallisarlugit piaartumik iluarsartuunneqarallartariaqarnissaat paasineqarsimavoq. Najugaqartullu isumannaatsumik najugaqarnissaat qulakkeerniarlugu tamanna pisariaqalersimalluni.
Illorsuarni makkunani ajoquteqartoqartoq paasineqarpoq:
B-1476 H J Rinksvej 14 - Blok 3
B-1477 H J Rinksvej 16 - Blok 4
B-1541 H J Rinksvej 22 - Blok 7
B-1542 H J Rinksvej 24 - Blok 8
Namminersorlutik oqartussat ilisimatitsipput.
Ineqarnermut Naalakkersuisoqarfiup siuliani pineqartut aallaavigalugit Namminersorlutik Oqartussani iluarsartuussisarnernut allaffeqarfik piumaffigaa illorsuit illersuuserneqarnissaat piaartumik isumageqqullugu aammalu illorsuarni pineqartuni betonngiminernik nakkaasoqarsinnaanera eqqarsaatigalugu illorsuit pineqartut tikinneqarsinnaajunnaarlugit assersoqqullugit.
Ajoquteqalersimasut tassaapput aneerasaartarfiit ataasiakkaat betonngitaat, aneerasaartarfiit natii toqqammaviilu betonngiusut aserortilersimaneri. Taamaasillunilu betonngiminernik ajornerpaaffiatigullu betonnginik ilivitsukkuutaannik nakkaasoqarsinnaanera aarlerinarsisimasoq Namminersorlutik Oqartussat tusagassiuutinut allapput.
IneqarnermutNaalakkersuisoqarfiup inissiaatileqatigiiffik INI A/S aqqutigalugu najugaqartut eqqorneqartut ilisimatinneqarnissaat sulissutigivaa. Najugaqartut qinnuigineqarput inissiaatileqatigiiffik INI A/S aqqutigalugu paasiniaasaqqullugit.
