Nuummi inissianut 200-nut aningaasaliisoqarpoq

Nunatsinni illoqarfiit pingaarnersaat tupinnanngitsumik sanaartorfioqaaq, alliartuinnarami inuttusiartuinnavillunilu. Meeqqerivimmik ukiut tamaasa sanasoqartarpoq, tassungalu aningaasaliisoqarpoq. Aammali kommunalbestyrelsep aappaagumut missingersuusiani ualiartoq saqqummiummagu, paasinarsivoq inissiat attartortittakkat 200-t sanaartorneqarnissaat aningaasaliiffigineqartoq. Borgmester Agnethe Davidsen ima oqarpoq:

- Inissaqarniarneq ilungersunarnerpaat ilagigaat kommunimi oqartariaqarpugut aamma qujanaraluaqisoq inuit namminneq akilikkaminnik initaarsinnaanerat ammaanneqartoq innuttatsinnit assorujussuaq atorneqarmat kommuni attartortitakkanik inissialiornissamut aningaasaliivoq, Agnethe Davidsen oqarpoq.

Namminneq initaartut amerlasoorujussuusarput, ilaqutariit aammalu peqatigiiffiit andelsboligit aquutigalugit.

- Kisianni taakkua saniatigut eqqaamasariaqaratsigu aamma ilaqutareeqartoq nammineq akilikkamik inissaminnut akissaqanngitsunik. Taamaattumik nalinginnaasumik attartortitassanik inissialiortiterneq pingaartilluinnaqqissaaratsigu siorna budget-ilerigata immikkoortitsivugut 100-nik sananissatsinnut. Aamma taamatorluinnaqqissaaq 100-nik sananissamut ippassaani immikkoortitsivugut, taamaalilluta neriuutigalugu piffissami qanittumi inissiat katillugit 200-t sananeqarnerat aallartissinnaassallugu, borgmesteri nangippoq.

Agnethe Davidsenip naatsorsuutigaa, pilersaarutit aallartinneqareermata, 2008-mi inissiat sanallugit aallartinneqarumaartut. Inissiat taaneqartut 200-t saniatigut aamma Qinngutsinni atuarfiliassamut aningaasaleeqqittoqarpoq, meeqqat innarluutillit ornittagassaannik sananissamut aningaasaliisoqarluni aamma ilinniartut inissaannik 50-inik sananissamut immikkoortitsisoqarluni. Taakku saniatigut Nuup nunaqarfiisa ilaanni Qeqertarsuatsiaani qangali kissaataasoq timersortarfeeraq minihali aningaasaliiffigineqarpoq, soorluttaaq Nuummi angerlarsimaffeqanngitsut najugassaannut 1,5 mio. koruuninik immikkoortitsisoqartoq.

Nuup Kommuneata missingersuutaasa aningaasartarai 1 milliardi koruunit, amigartoorutissatullu naatsorsuutaapput 127 mio. koruunit.

Nuummi akileraarutip allanngorani 25 procentiuginnarnissaa kommunalbestyrelsep aamma akueraa.