Nuummi inissianik tunisinissaq Vittus Qujaukitsup aalajangiusimavaa

Illuut A/S-ip Nuummi Qinngutsinni inissiaataanit 420-iusunit 150-it attartortunut tunineqarnissaannik Naalakkersuisut saqqummiussaat suleqatigiit suligasuartussat maanna misissuiffigileruttorpaat. Aningaasanik taarsigassarsisitsisarfiit kaammattuutaannut naatsorsuutigisaannullu naleqquttumik periaasissamik kiisalu nunatta karsiata isertitassatut pisariaqartitaanik attartortullu inigisaminnik pisinissaminnut periarfissinneqarnissaannik Naalakkersuisut anguniagaat misissorneqassapput.
Allattoq Simon Uldum
septembarip 11-at 2013 08:03

Naalakkersuisut aningaaaseriviit GrønlandsBanken, Bank Nordik aamma Nykredit Namminersorlutik Oqartussat Illuut A/S-ip inissiaataanit 420-iusunit 150-inik tunisinissamik pilersaarutai pillugit arfininngormat ataatsimeeqatigaat.

Sulisitsisut Kattuffiata pilersaarutit isornartorsioreerpai, ilaatigut oqarlutik inissianik tunisineq akisussaassuseqanngitsumik misileraanerussasoq, taamatut iliorneq maanna inissianik piginnittuusunut kingunerlutsitsissammat inissianillu taama amerlatigisunik ataatsikkut tuniseriasaarneq akinik appartitsissammat.

Demokraatit siulittaasuata Jens B. Frederiksenip Naalakkersuisut inissiarpassuarnik tunisinermikkut 90 mio. kr.-inik isertitaqarniarlutik pilersaarutaat tuaviuussaanerarlugu § 37 naapertorlugu apeqquteqaateqarluni aamma apeqquserpai.

Aningaasaqarnermut aamma nunami namminermi pissutsinut naalakkersuisoq Vittus Qujaukitsoq naapertorlugu, siunissami inissianik niuerfiup qanoq ilusiligaanissaata pitsaasumik minnerunngitsumillu angusaqarfiulluartumik oqaloqatigiissutigineqarnissaa amerlanernit isumaqataaffigineqarpoq, ilaatigut Akileraartarnermut Atugarissaarnermullu isumalioqatigiissitat kaammattuutigisimasai aammalu Siumup, Atassutip Partii Inuillu naalakkersuisooqatigiinnissamik isumaqatigiissutaat aallaavigineqassallutik.

Suleqatigiit suligasuartussat pilersinneqaqqammersut sisamanngorpat ataatsimeeqatigeeqqaassapput, siullertullu suliassaraat aningaasanut inatsisissatut siunnersuutip Inatsisartut ukiaanerani ataatsimiinneranni aappassaaneerneqannginnerani nalunaarusiussallutik.

Aningaasaqarnermut naalakkersuisulli Vittus Qujaukitsup inissiat 150-it siunissami qaninnermi tunineqarnissaat aalajangiusimavaa.

- Qinngutsinni inissiat taamatut amerlassusillit tunineqarnissaannik anguniagaqarnerput aalajangiusimavarput. Aningaaserivinnilli taarsagassarsisisisarfinnillu oqaloqateqarnitsinni inissianik niuerfiup qanoq nammataqarsinnaatiginera eqqartorparput, tassalu inissiat 2014-imiinnaqq tuniniarnagit piffissap sivisunerusup ingerlanerani tunissanerigut, aningaasaqarnermut aamma nunami namminermi pissutsinut naalakkersuisoq Vittus Qujaukitsoq taama oqarpoq.