Nuummi inerteqqutit nutaat: 1500 koruunimik akiligassinneqarsinnaavutit

Ajornartoornermi meeqqaminnik paarititsisinnaappat? Inerteqqutit nutaanik unioqqutitsinermi akiligassinneqartoqarsinnaava? Arlaata unioqqutippai?

Nuuk pingasunngornermi nalunaaqutaq 16.00 matuilluni matuvoq.

Nunatsinnimi inuk alla coronavirusimik tunillatsissimavoq, taannalu Nuummi tunillatsissimasinnaavoq. Taamaammat illoqarfiit pingaarnersaanni tuniluuttoqarsinnaalera pissutigalugu illoqarfiit pingaarnersaat aamma mattunneqarpoq.

Pisiniarfiit, nujaleriffiit, atuarfiit, ulluunerani paaqqinniffiit matupput – inuillu silami illilluunniit iluani qulinit amerlaneroqqusaajunnaarput.

Malittarisassat nutaat apeqquterpassuaqarnissamut pissutissaqartitsipput. Kikkummi ajornartoornermi paaritittarfimmiitsitsisinnaappat? Inerteqqutinillu nutaanik unioqqutitsinermi pillaatissiisoqarsinnaava? 

AAMMA ATUARUK Nuuk matuvoq: Nalunaaqutaq 16:00-imiit ima ilioqqusaanngilatit

Tamanna maani ataani akissutissarsineqarsinnaapput, tassa KNR-ip apeqqutai Tunillaassortunik nappaalanersuaqarneranut ataatsimiititaliarsuup siulittaasuata, politimesterip, Bjørn Tegner Bayip akissuteqarfigai:

Katerisimaarnermi inuit qulinit amerlaneruteqqusaannginnerannut inerteqqut nutaaq unioqqutikkaanni pillaatissiisoqarsinnaava?

- Aap, pillaateqartoqarsinnaavoq. Tunillaassortunik nappaalanersuaqarneranut ataatsimiititaliarsuup Nuummiit aallarnissaq arfininngornermiit inerteqqutaassasoq aamma katerinnerit silami illullu iluani inuit qulinit amerlanerussanngitsut aalajangerpaa. Taakkuninnga unioqqutitsineq akiligassiissutaasinnaavoq. Tamanna pisariaqalissagaluarpat tupaallaatigerujussuassavara. 

Akiligassiineq taanna qanoq annertutigissava?

- Danmarkimi Naalagaaffiup eqqartuussisuunerata tamatumani inummut ataatsimut aallaqqaasiutigalugu 1500 koruunimik akiligassiutaassasoq aalajangerpaa. Tamanna tunngavigaarput, kisianni eqqartuussisoqarfiup kingulliulluni akiligassiissutaasussaq aalajangertussaavaa.

Nuuk Center matuvoq – Pisiffik kisimi ammavoq.

 

Kapisilinnukarlunilu nunamut niugaanni? Illoqarfinnummi nunaqarfinnullu Nuummiit maanna aallartoqaqqusaanngilaq. 

- Tunngaviusumik 1500 koruuni inummut ataatsimut. Taamaammat umiatsiaaqqami inuit sisamaagunik taava taakku tamarmik immikkut 1500 koruunimik akiligassinneqassapput. Taava tamanna eqqartuussiviit isumaqatigineraat takujumaarparput.  

Pisiniarfiit ammatinneqarunik – taava susoqassava?

- Pisiniarfiit nerisassanik nioqquteqarfiit minillugit maanna matoqqasussaapput. Inatsisiliornera tamanna suli inissivinngilaq. Danmarkimi aamma taamaattoqarpoq. Taamaammat pisiniarfiutillit paasinneqqullugillu suleqataaqquagut – pisiniarfiutillilli inatsisitigut akiligassissinnaanngilagut.

AAMMA ATUARUK Inuussutissarsiortunut ikiorsiissuteqarnissaq ullumikkut isumaqatigiinniutigineqartoq

Inuussutissarsiuteqarnermit Tunillaassortunik nappaalanersuaqarneranut ataatsimiititaliarsuarmi sinniisoqalernissaq isumaliutigaasiuk?

- Naamik. Tunillaassortunik nappaalanersuaqarneranut ataatsimiititaliarsuarmi kikkut ilaassanersut inatsimmi allassimavoq. Inatsimmi allassimanera malissavarput – tassa innuttaasut peqqissusaat. Inuussutissarsiortunut tamanna sakkortorpalussinnaavoq, ksiianni aningaasatigut kingunissaat eqqarsaatigisinnaanngilagut. Tamanna Naalakkersuisuniippoq.

Nuup qeqqani Imaneq – inoqanngilluinnangajappoq.

 

Coronamik ersiuteqaraanni – angerlarsimananilu angalaaginnaraanni – taava qanoq iliussavisi?

- Pineqartoq coronamik tunillatsissimappat taava angerlarsimaannaqqusaanermik inassuteqarfigineqarsinnaavoq pinngitsaaliissummillu mattunneqarsinnaalluni. Taamaattoqassagaluarpalli uissuummingaatsiassaanga. Ilisimasakka malillugit inuit napparsimasut napparsimmaviup oqaatigisaanik malinnittarput.

Angerlarsimaannaqqusaallunga – tunillatsissimananga – aniguma – taava susoqassava?

- Angerlarsimaannaqqusaanermut tunngappat, uagut piumasaatitsinninngaanniit sukannersumillu kaammattuinitsinnit inatsisitigut tamanna inatsisitigut unioqqutitsinertut isiginweqarsinnaanngilaq. Taamaammat maannakkorpiaq akiligassissinnaanngilatsigit. Kisianni inuit angerlarsimaqqusaaginnarnerminnik malinninngippata inatsiseqarneq nalilersoqqittariaqassavarput.

AAMMA ATUARUK Angerlarsimaffimmi mattussaaqqaneq? Ima iliussaatit

Suliffeqarfinnut inunnullu ataasiakkaanut akiligassiinerit assigiinngillat?

- Maannakkorpiaq naamik, inatsisilli piffissap sivikitsup ingerlanerani inissinneqarnissaat qularutiginngilara, taamaammat akiligassiinerit assigiinngitsunngussapput.

Pingasunngornermi malittarisassat nutaat atuutilerneranit unioqqutitsisunik assersuutissaqarpit? Arlaannit unioqqutinneqarpat?

- Tamanna ilisimanngilara.

Nuuk Centerimut isaariaq

 

Suna tamarmi matoqqanersoq qulakkeerniarlugu politiit aqqusinermi nakkutiginnittut amerlanerussappat?

- Pissutsit ineriartornerat apeqqutaalluinnarpoq. Innuttaasut amerlanerpaarpaartaat innersuussutitsinnik malinnipput.

Kikkut ajornartoornermi paarsititsisinnaappat? Tassa kikkunuku inuiaqatigiinnut pingaarutilinnik suliaqartuusut?

- Siullertut kommunit ajornartoornermi meeqqanik paarsititsinermik aaqqissuussisuupput. Peqqinnissaqarfimmi sulisut taakku isumakuluutissinneqarnerpaapput. Aammali politiini, Issittuni Sakkutooqarfimmi sulisut aamma angerlarsimaffimmi ikiortit. Aamma telemi teknikeriusinnaavoq, taakku attaveqaateqarnissamut qulakkeerisussaapput. Tamanna piviusumik nalilersorneqartuaannarpoq.  

Isummersuutit

Coronavirusimik tunillatsinissaq pinaveersaaruk

Nunatsinni coronavirusi pillugu killiffik

  Misissorneqareersimasut 7701
  Tunillanneqarsimasut 14
  Peqqisseqqittutut nalunaarutigineqartut 14
  Napparsimavimmi uninngasut 0
  Anersaartuuteqartitaasut 0
  Toqquteqartut 0
Pissarsivik: nun.gl
  Nutarterneqarpoq
  septembarip 23-at 2020 nal. 10:45