Nuummi immiorneq ingerlallualeruttorpoq

Nuummi Bowlingertarfikumi sungarnitsussarsunnik maanna naamasassaavoq. Tipimut nalliuttorsiortoqarsimanera pissutaanngilaq, nunatsinnili nammineerluni immiaaqqiap siulliup, immiorneqaleruttornera taama tippatsitsisuuvoq. - Aaku qappiorfiit arfineq pingasut, immiaaraq qamani uunneqareeraangami taakkunani qappiorneqartarpoq. Immiaararlu qappiorneqareeraangat qappiorfiit toqqorsivittut atortarput, nunatsinni akuerisaalluni immiorsinnaanngorsimasoq siulleq, Jan Olsen oqarpoq.

Suliffeqarfik Hotel Godthåb immiorfimmik pilersitsisuuvoq, immiaaqqat økologiskiussanerarpaat. Allatut oqaatigalugu aanaveersaateqaratillu akuutissiaqassanngillat.

Tusagassiortoq Thomas Grue immiamik suli naammassinngitsumik misiliilaaqqammerluni oqarpoq, immiaq massakkorpiaq seernaasattumik tungusunniusattumik mamaqartoq, taamalu mamaqartussaagunanngimmat qappiornera naammassipallaqqugaluarpaa.

Immiaaqqatut mamaqalernissaa sivisuallaarunnaartoq immiortoq Jan Olsen oqarpoq. Immiorfik assigiinngitsunik marlunnik aallaqqaasiullugu saqqummiussissooq, Immiaaraq/Godthåb Pilsner aamma Baaja/Godthåb Classic.

Immiorfimmilu tankersuit angissusaat naapertorlugu immiaminnik nunguutsigallarunnanngillat.

Tankersuit traktoritulli angitigisut imaqarluarsinnaapput:

- Tankersuit arfineq pingasut uku, tamarmik immikkut 4.000 literimik imaqarsinnaapput, arfineq pingasullu qamaniittut tamarmik immikkut 2.000 literimik imaqarsinnaapput, Kalistiinaaqqamilu, siunissami maqiterivimmut ilannguppat, 8.000 literimik imaqarsinnaassallutik. Tassa tamarmik katillugit 56.000 literi, Jan Olsen oqarpoq.

Tassa imaappoq illoqarfimmi 16.000-it missaannik inulimmi immiaaqqat 56.000 literi.

- Inuit immiaaqqat usserunikkit imissaqqaarpaat, immiortoq Jan Olsen nassuiaavoq.