Nuummi imminoriarnerit pingasut

Nuummi politiit nalunaarutaani atuarneqarsinnaavoq inuit pingasut sapaatip-akunnerata naanerani imminoriaraluarsimasut, qujanartumillu unitsinneqarsimasut.
Allattoq Mads Lynge
novembarip 26-at 2007 11:19

Imminoriarnerit pingasut Nuummi politiinit sapaatip-akunnerata naanerani unitsinneqarsimapput, politiit nalunaarutaani tamanna atuarneqarsinnaavoq.

Arnaq inuusuttoq tallimanngormat unnukkut imaanut Nuuk Imerup eqqaani avalappoq imminorniarluni. Politiit ambulancillu takkupput, sivitsunngitsorli nammineq piumassutsiminik qaqeqqippoq nakorsiartarfiliaanneqarlunilu.

Niviarsiaraq aalakoortoq aamma tallimanngormat inissiat arlaannit 5.saliminngaanniit imminut iginniarluni siorarsaarivoq. Imminulli suli iginngitsoq tiguneqarpoq kommunillu sullissisuinut tunniunneqarluni.

Angut inuusuttoq arfininngormat unnukkut aalakoortoq imaanut imminut iginniarluni siorasaarivoq. Politiinit ilaquttaminukaanneqarpoq.

Nuussuarmi erngunnermi 55-inik ukiulik tunumigut savimmik marloriarluni kapineqarpoq, inuunerminilli ulorianartorsiornani. Arnaq 46-nik ukiulik tigusarineqarpoq annersaasimasutullu unnerluutigineqarluni. Ulluni 14-ini tigummigallagassanngortinneqarpoq, illersuisuatali aalajangiineq nunatsinnut eqqartuussivimmut ingerlateqqippaa.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq