Assi: Merete Lindstrøm

Malittarisassat sakkukillineqaraluartut: Nuummi imerniartarfiit sivisunerusumik ammasalernavianngillat

Naak imigassaq pillugu inatsisip ippassaq atuutilersup imerniartarfiit ullaassakkut nalunaaqutaq tallimat tungaannut ammasinnaanissaat ammaassiffigigaluaraa, Nuummi imerniartarfiit sivisunerusumik ammasalernissaat Nuummiut naatsorsuutigissanngilaat.

Imerniartarfimmi sivisunerusumik piffissami qaninnermi ammasalernissaat naatsorsuutigissanngilaat.
- Ammasarfitta allanngortinneqarnissaat pilersaarutiginngilarput, tassa imaappoq, maanna ammasarnigut attatiinnassavavut, Hotel Hans Egedep pisortaanera Jørgen Bay-Kastrup oqarpoq.

AAMMA ATUARUK - Inatsimmik sakkukillinissamut aalajangiinnginnermi eqqarsarluaqqaaritsi

Hotel Hans Egede Nuummi imerniartarfinnik tallimanik piginnittuuvoq.

Imigassaq pillugu inatsit nutaaq ippassaq sisamanngornermi atuutilersinneqarpoq, imerniartarfiit imigassanik sapaatip-akunnerisa naaneranni ullaassakkut nalunaaqutaq sisamat tungaannut sassaallersinnaanissaat periarfissaalerluni. Imerniartarfiit taassuma saniatigut nalunaaqutaq tallimat tungaannut ammasinnaalersinneqarput.

Isertitaqarnerulernavianngitsut

Nuummili imerniartarfiit ornigarneqarluarnerpaat tallimat sivisunerusumik ammasalernavianngillat.

Imerniartarfiit sivisunerusumik ammasalerpata isertitaqarnerulernissartik, Jørgen Bay-Kastrupip ilimaginngilaa. Inuit aalakoornerullutik imerniartarfiliartalernissaat, taassuma saniatigut aarleqqutigaa, soorlu aamma imerniartarfiit matunerisa kingorna nangikkiaasarnerit takussaanerulernissaat ernummatigigaa.

- Inuit kingusinnerusukkut illoqarfiliartalernissaat malitsigisinnaavaa, taamaasilluni nangikkiaanerit kingusinnerulissapput, ullaap tungaanut nangikkiaasoqarnerusalissagunarluni, Jørgen Bay-Kastrup oqarpoq.

Imerniartarfinni sulisunut aningaasartuutit aamma amerlissapput, naak kaaviiaartitat amerlanerulinngikkaluartut. Taamaattoq pisortaaneq aamma nuannaarutissaqarpoq.

AAMMA ATUARUK Lufthavne, alkohollov og socialindsatser prægede 2018

Ammasarfiit allanngortinneqarnerat assigiinngitsutigut aamma iluaqutissartaqarput. Imerniartarfiimmi nalliuttuni unnuap-qeqqanut matusalernissaat, inatsitigut siorna 2018-imi marsip aallaqqaataani atuutilersinneqarpoq, taannalu maanna atuukkunnaarsinneqarpoq. Tamanna nuannaarutigaarput, pisortaaneq oqarpoq.

- Inuimmi nalinginnaasumik unnukkut nalunaaqutaq aqqarnup missaani illoqarfiliartartut ilisimavarput, tamannalu pissutigalugu ukiup ingerlanerani ullut arfinillit-arfineq-marlulluunniit sivikinnerusumik ammasalertariaqarsimavugut, kaaviiaartitagullu tamanna pillugu ikinnerulerlutik, Hotel Hans Egedep pisortaanera Jørgen Bay-Kastrup oqarpoq.

Nittarsaassinrq inerteqqutaajunnaartoq

Assersuutigalugu viinninik ussiinissamut aaqqissuussat, tusarnaartitsinerillu imigassanik sassaallerfiusut pillugit nittarsaassisoqaqqissinnaalernera Bay-Kastrupip aamma nuannaarutigaa.

Imigassaq pillugu inatsit nutaaq ippassaq sisamanngornermi tassa atuutilerpoq, sivisunerusumillu illoqarfimmiilersinnaanissaq periarfissanngorpoq, Nuummili imerniartarfinni amerlanerni tamanna tassa periarfisaanaviarnani.

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat