Nuummi imerniartarfiit annerpaartaat matusoq
Nuummi imerniartarfik Manhattan ukiut 14-t matuma siorna ammartoq arfininngormat kingullermik ammainneqarpoq, nipilersuullu qaminneqarluni.
Imerniartarfiup illutaa Pisiffimmut attartortinneqarpoq, taannalu immunnik allanillu ulluinnarni atorneqartartunik siunissami tuniniaavinngussaaq.
- Ullumikkut nuannaartorineqartut malinnaaviginissaat pingaaruteqarpoq, ullutsinnili pissutsinut ineriartornermullu malinnaanissaq taamatulli pingaaruteqartigaaq, Nuummi neriniartarfinnik imerniarfinnillu ingerlatsivimmi Heca Nuuk A/S-imi siulersuisuni siulittaasoq, Helge Tang, oqarpoq.
Imerniartarfik Manhattan 2006-imi ammarneqarmat immiorfik Godthaab Bryghus aamma pilersinneqarpoq. Tamannali pinngikkallarmat Juhl aamma Tang, Tulle Rock Cafemik Disco Palacemillu ingerlatsisuupput.
Ukiuni 44-ni imerniartarfiuteqareerlutik taamaatittut
Immiorfik Godthaab Bryghus, imerniartarfiillu Daddy´s aamma Pub Takuss ammaannassapput, taakkuali nutaamik piginnittoqalissallutik. Takussip Daddysip Red Dragonillu ingerlanneqarnerat taakkualu illutai allamut tunineqarput.
Larseeraq C. Egede Nuuk A/S Grønlands Ejendomskontorimeersoq aamma Nicolai Haagen Olesen Repensomeersoq taakkuninnga ingerlatsisunnngussallutillu piginnittunngorput.
- Ukiuni 44-ni imerniartarfiuteqarnerput naammatsilermat taamaatinnissarput piffissanngorpoq, Helge Tang oqarpoq.
Imerniartarfinnik, neriniartarfinnik akunnittarfinnillu ukiorpassuarni ingerlatsisut Carl Juhl aamma Helge Tang allanik ingerlataqalissapput, tassalu akunnittarfik nutaaq HHE Express apriilip aallaqqataani ammassaavaat.