Nuummi imeq akitsoqaaq

Innuttaasut marloriaammik akiliisalernissartik naatsorsuutigisinnaavaat, tamanna Nukissiorfinni nutarterisoqarneranik, sanaartornermillu pissuteqartoq Nukissiorfiit nassuiarpaat.
apriilip 12-at 2010 16:17

Imeq kissatseruloorlugu sakkortuumik kuutsitsivigaluni uffarfimmi iluarusunniaraanni, errorlaanik tipigissunik atisaqarniaraanni, minnerunngitsumillu anartarfik kuutsikulaarniaraanni kisianni aningaasivik imaangajallugu.

Imermut akiliutip 45 procent-imik qaffanneqarnera pivoq ukioq manna januaarip aallaqqaataani.

Atuisorlu qaammammut 240 koruuneertarsimaguni akiliutimi qaavatigut maanna 110 koruuneertalissaaq.

Nukissiorfiit paasissutissiinermut pisortaata Louise Johansonip akitsuinermut pissutaanerarpai 2007-imi imermut akigitinneqartut annikiippallaarsimanerat, imeqarfinnik ledninnginillu imermut sarfanullu aqqutinik aaqqissuinerit, ilaterinerillu annertuut ingerlassimavavut. Illoqarfiup anginerulernatigut imeq siammartigassarput anginerulinngikkaluarluni erngup aqqutaa takinerulernikuuvoq. Tamassumalu kinguneraa nutaamik imeqarfilioqqittariaqalernerput.

Tamakkuuppullu akitsuinermut pissutaaqataasut, Louise Johanson nassuiaavoq.

Imermut akiliutip qaffanneqarnera Louise Johansen naapertorlugu januaarimili inuaqatigiinnut nalunaarutigineqareerpoq, kisianni atuisunut toqqaannartumik allakkatigut ilisimatitsinngilagut, Louise Johanson oqarpoq.

Nukissiorfiit naatsorsuutigaat suliat akilerpata, imermut aki appaqqikkumaartoq.

Nukissiorfiit imermut akigititaa tunisaqarsimaneq aallaavigalugu nalilerneqartarpoq, paasissutissiinermullu pisortaq Louise Johanson naapertorlugu akitsuinermut peqqutaaqataasut ilagaat, imeq aalisakkerivinnut tunineqartoq piffissaq kingulleq annikillisimammat.