Nuummi Ilulissanilu Arctic Importip niuertarfii Pisiffiup tigussagai

Ilulissani Nuummilu ulluinnarni pisiniarfigisartakkat ukiortaamiit allannguuteqartussanngorput.
Sulisut suliinnassasut Pisiffimmit erseqissaatigineqarpoq. Assi © : Google Streetview
Allattoq Karsten Sommer
novembarip 08-at 2019 06:17

Arctic Importip pisiniarfiutai Nuummi Ilulissanilu Pisiffiup tigussagai isumaqatigiissutigineqaqqammerpoq.

Tamanna niuertarfiit unammilleraluttuinnarnerannik aallaaveqartoq, Arctic Importimit nassuiaatigineqarpoq.

- Brugseni Pisiffillu unammillertiginerpaavavut, taakkulu ima aningaasaliisimatigipput niuffaffeqarfimmi pisariaqartinneqartumit annerusumik pisinnaasaqalerlutik, Arctic Importimi pisortaaneq, Thomas Hjort nassuiaavoq.

Nuummi niuertarfiit "SUPER! aamma "Farmers" pineqarput, Ilulissanilu "Nivi" "Jope"-lu pineqarlutik.

Niuertarfiit tamarmik Pisiffimmit ingerlanneqalissapput, "Jope" Ilulissaniittoq minillugu, tassani Pisiffiup nioqqutissat kisiisa tigussavai Arctic Importillu illu allatut atugassatut tigummiinnassallugu.

Arctic Importip Pisiffiullu isumaqatigiissut atsioreerpaat, maannali unammilleqatigiinnermut oqartussat akuersissuteqarnissaat utaqqisaaginnalerpoq. Tamannali decembarip aallartinnerani pilersaarutaasoq Arctic Import tusagassiutinut allappoq.

Niuertarfiit tiguneqarpata sulisut suliffeerunnissaminnut ernumassutissaqanngitsut, Pisiffiup pisortaa Per Steen Larsen oqarpoq.

- Arctic Importimi sulisut tamaasa sulisoriinnassavavut. Taamaalilluta niuertarfimmi ilisimasallit misilittagallillu atorluarlugit aaqqissuussisassaagut, Pisiffik paasissutissiivoq.

Pisinermi akit pisortatigut saqqummiunneqassanngitsut illuatungeriinni isumaqatigiissutigineqarpoq.