Nuummi illorsuaq portunersaq nutserfigineqarpoq
Nuummi illorsuit portunersaat Telepostip sanatitaa atuisussanit atorneqalerpoq, illorsuarmili init suli tamarmik inniminnerneqarsimanngillat.
Illorsuaq quleriinnik qulinik initaliup sananeqarnera 140 milliuuni koruuninik naleqarpoq. Illorsuup naqqani Telepost niivertarfiutigisumik allakkerisarfittaarpoq kiisalu allakkerisarfiup qulaani aningaaserivik Sparbankvest inissisimavoq, aningaaseriviullu qulaani Atuagalliutit eqartuussissuserisullu Nuna Advokater allaffittaaqqammerput.
Illorsuup inissiaatai qulit suli pisiarineqaratillu attartorneqarsimanngillat.
Tamannali piginnittunit ernummatigineqanngilaq, Telepostip siulersuisuisa siulittaasuat Kaj Egede radioaviisimut oqarpoq siulersuisut aarlerissutissaqanngitsut, illorsuup sananerani amigartooruteqartoqarnavianngimmat.
Illorsuarmi inissiat 2,1 milliuuni koruunit, 3,4 milliuuni koruunillu akornanni akeqassapput, qullerpaartaaniittorlu 4,6 milliuuni koruunit atorlugit pisiarineqarsinnaavoq.
Magnus Agerskovip inissiat tunineqarnissaanut attartorneqarnissaanullu isumaginnittup ilimagaa inissiat naammassereerpata nittarsaanneqareerpatalu tunineqarumaartut.
Inissiat tunineqassanngikkaluarpata Teleposti sutigulluunniit akitsuissanngitsoq Kaj Egedep naatsorsuutigaa.
Nuummi allakkeriviup inissisimaffikua Brugsenip akianiittoq 29 milliuuni koruunilerlugu Telepostip tunisimagaa Kaj Egedep ilanngullugu nalunaarutigaa.
