Nuummi ilerrit serlersaarfigineqartut

Nuummi iliveqarfiit ilaanni ilerrini sanningasut aqqanillit serlersaarfigineqarsimapput, killormut saatinneqarsimallutik. Nuummi palasi Marianne Platou Olsen isumaqarpoq satanisiortuusinnaasut.

-Takoqqaarakkit alla eqqaaqqaannginnakku satanisiortut pissusaattut iliortoqarsimasoq, kisiannilu uppernarsaatissaqartinnagu ilumut taamaattoqarsimanersoq imaluunniit erlersaariniaannarluni taamaaliortoqarsimanersoq. Naluagaluarparput satanisiortuunersut nunatsinni tamakku tusaamanannginnamik, kisianni taanna pissuserisarmassuk eqqaasara siulleq taannaavoq, Nuummi palasi Marianne Platou Olsen oqaluttuarpoq. Sapaatip akunnerata kingulliup naalernerani Nuup illoqarfiani iliveqarfitoqqami sanningasut aqqanillit peeriarlugit killormut saatinneqarsimapput ilaalu uppikaatinneqarlutik. Marianne Platou Olsen oqaluttuarpoq palasiunermi nalaani tamanna misiginikuunagu, pisorlu politiinut tunniunneqarsimasoq.

-Politiinut kalerriutigivarput, takunnissimasinnaasoqarpallu kajumissaarivugut politiinut palasinulluunniit saaffiginnissutigeqqullugu. Makku ilerrit eqqissisimatitaasut taamatut iliorfigineqarsimasut kusanaaqimmat tujorminaqimmatalu, Marianne Platou Olsen oqarpoq. Nuummi politeeqarfimmi pisortaq Bent Heisselberg oqarpoq, pisoq suliassatut allatut tigusimagitsik, sulili paasissutissaasinnaasunik pissarsinatik.