Nuummi ikuallatsitseqattaartoqarpoq
Containerit sunik imaqarnersut nalunarsinnaasarmat ikuallatsitsinerit inunnut ulorianarsinnaasut, Nuummi qatserisartut pisortaata Knud Petersenip mianersoqqussutigaa:
- Containerit sunik imaqarnersut nalunartarnermik, illunullu qanoq qanitsiginersut. Ikuallarujussuarunik illu ilanngussinnaavaat unnuakkuuppat, unnuakkummi takkunniartarnerput minutsinik marlunnik pingasunilluunniit sivisunerusinnaasarmat, Nuummi qatserisartut pisortaat Knud Petersen KNR-imut oqarpoq.
Containerit eqqaaviit katillugit arfinillit Nuup qiterpasissuaniittut ullut unnuallu kingulliit marluk ikuallatsinneqarput, politiillu massakkut paasiniaaleruttorput, sulili pasisaqaratik.
Taamaammat Nuummi innuttaasut ikuallatsitsinernut atatillugu takunnissimagunik tusagaqarsimagunilluunniit Nuummi politiinut saaffiginninnequneqarput.
- Nalinginnaasumik pissusilersoratik illoqarfimmi ingerlaartut innuttaasut maluginiassavaat, immaqalu siarngutigalugit. Tamanna qujassutigissagaluaqaarput, Johan Westen Nuup politiiviniit oqarpoq.
Qatserisartullu pisortaata Knud Petersenip mianersoqqussutaa ingerlateqqissavarput:
- Ikuallatsitsisaqattaartut ima oqarfigerusunnarput: Containerit sunik imaqartarnersut naluarput. Puiaasat gassinik assigisaannilluunniit imallit iginneqarsimasinnaapput. Qatserisartut taamatut aggersarneqaqattartarnerat inuiaqatigiinnut akisoorujussuuvoq. Neriuppunga ikuallatsitsisut taamaaliorunnaassasut, Knud Petersen oqarpoq.
Nuummi politiit oqarasuaataat normoqarpoq: 321448.