Nuummi hiistertarfittaassaq ima isikkoqassaaq
Nuummi hiistertarfimmut, VISKA-mut, pilersaarutit Katuami sapaatit-akunnerata tulliani paasissutissiilluni ataatsimiititsinermi saqqummiunneqassapput.
Ataatsimiigiaqqusissummi atuarneqarsinnaavoq Nuummi hiistertarfiliornissamik pilersaarutit hiisternermuinnaq tunngassuteqanngitsut.
Qinngutsinnimi Atuarfik Hans Lyngep avannamut kangiatungaani narsaamanermi illuaqqat sisamat initallit, café, garage, nersutaasivik aamma hiistertarfik pilersaarutaapput.
Kommuneqarfik Sermersooq naapertorlugu takornariaqarnermut suliniuteqarnissaq, hiistertarfimmik immikkut ittumik ingerlatsiffiusumik, sunngiffimmi hiistertarfimmik, unnuinertalimmik hiistertarfimmik aamma hiistertarfiup nersutaasiviani allanik sammisassaqartitsiniutinik ingerlatsisarnissaq isummersuutaavoq.
Pilersaarusiortut hiistit pingasut aallarniutigissamaarpaat, siulliillu sungiusseriarpata amerlanernik tikisitsissallutik. Nersutaasivik pilersaarutaasoq malillugu hiistinut 28-nut inissaqarsinnaavoq.
Suliniut pillugu paasisaqarnerorusukkuit Katuamut pingasunngornermi apriilip 19-iani nal. 19.00 ataatsimiititsinermut peqataajartorsinnaavutit.
