Nuummi eqqumiitsulianut katersugaasivittaarput
Nuuk Kunstmuseum, tassalu eqqumiitsulianik katersugaasivik immikkut qaaqqusanut ullumi atoqqaartinneqarpoq. Katersugaasivik namminersortumit ilisimaneqarluartumit Svend Jungemit pilersinneqarpoq, katersugarpassuilu qalipakkat eqqumiitsuliallu ullumikkut 75-iliineranut atatillugu saqqummersinneqarlutik.
- Ukiuni 40-ni katersisimavunga, Kalaallit Nunaannut tunngasut nuannarilluarakkit. Siornaannguarlu aalajangerpunga katersakka toquguma siaruaatissanngimmata, meeqqallu tigorusutatik tigoreermassuk, saqqummersitsivimmik pilersitsiniarlunga. Svend Junge nassuiaavoq.
Katersugaasivik illorsuuvoq pingasoqiusaalluni. Nunatsinni qalipaasarsimasut ilaatigut Emanuel A. Petersenip, Harald Moltkep, Christine Deichmannip, Aage Gitz-Johansenip aamma Otto Rosingip qalipagatoqarsui katersugaasivimmiipput. Taamatuttaaq eqqumiitsuliarpassuit, soorlu tupilaat, ukkusissamik qiperukkat, qajaaqqat ulullu saqqummersinneqarput. Eqqumiitsuliat assigiinngitsut 1.000-it missaanniittut Svend Jungep pisiarisimasaasa akisunersaraat I.E.C Rasmussenip aasaanerani qalipagarsua. Qalipagaq Københavnimi akitsorterussinermi 350.000 koruunit angullugit nalilerneqarsimavoq. Svend Junge ima oqaluttuarpoq:
- Akitsorterussinermi 900.000 koruunit angugatsigit tunuarama miserratigissanngilara, millionili pallikkaallu nuliama pilerpaanga: qaa, pisiumasoq ataasiinnanngorpoq, tuavi, pisiariniarniaruk, aviisinillu anaallunga. Taamaalisorlu akitsorterussisup ilaaneraleriarmanga, allatut ajornartumik ilannguteqqiinnarpunga, naggataatigullu 1,2 million koruunilerlugu pisiaraara. Svend Junge nassuiaavoq.
Svend Jungelli pisiarisimasami erlinnarnerpaattut isigisaa allaalluinnarpoq, tassalu tyskip nakorsap nuliata danskip Christine Deichmannip qalipagarsua, arnaq meeqqallu assilillugit qalipataq.
- Meeqqat utoqqaallu assilillugit qalipattarsimavai, tupinnaannartumik qalipalluagaasimasarput suullu tamarmik ersittarlutik. Assorsuaq pikkorissimavoq. Svend Junge oqarpoq.
Svend Junge aamma oqarpoq, toquguni katersugaasivik katersukkallu Nuup Kommuneanut tunniunneqarnissaat qulakkeereersimallugu.
Nunatta Katersugaasiviani Allagaateqarfianilu pisortaasimasoq soraarneq Emil Rosing katersugaasivimmi ulluinnarni ingerlatsisuussaaq. Katersugaasivik innuttaasunut tamanut tallimanngorpat ammarneqassaaq.
