Nuummi eqqakkat ulorianartut katersortalissavaat
Eqqakkat soorlu errorsiviku, nillataartitsiviit atortorissaarutillu innaallagiartortut allat avatangiisinut ulorianartunik akullit eqqakkanut allanut ilanngunnaversaarneqartalissapput. Eqqakkanik ulorianartunik katersisarnissaq pillugu pilersaarutit Kommuneqarfik Sermersuumi kommunalbestyrelsep ullumi oqaluuseraa.
Taamaattumik eqqakkanik ulorianartunik katersinermi atugassamik biilimik pissasisoqassaaq. Biili taanna atortorissaarutinik innaallagissamoortunik errorsivikunillu katersinermi atorneqarsinnaasutut suliaassaaq.
Tamanna misiliinertut ingerlanneqaqqaassaaq illullu nammineq pigisat kisimiugallartoq orninneqartassasut, kommunalbestyrelsep ataatsimiissutissaani Kommuneqarfik Sermersooq allappoq. Eqqarsaataavoq Nuummi illut 1.000-it 2.000-illu missaat taamatut sullinneqarnissamik neqeroorfigineqassasut.
Pilersaarut aningaasaqarnermut ataatsimiititaliap tusaatissatut tigoreerpaa. Tulliullugu suliarinnittussarsiuussineq ingerlanneqassaaq. Kommune ilisimatitsivoq katersinermi atortussat pisiarinerat landskarsimit aningaasalersorneqassasoq.